रुकुम पूर्व / जिल्लाको भूमे गाउँपालिका वडा नम्बर ९ चुनबाङमा एक घरमा आगलागी भएको छ ।

९ नम्वर वडाको ११ नम्वर टोल स्थित डाँडाँगाउँका भिमबहादुर विकको घरमा बुधबार दिउँसो ३ बजेतिर आगलागी भएको हो । आगलागी हुँदा अनुमानित तीन लाख बराबरको क्षती भएको वडा अध्यक्ष प्रवेश पुनले जानकारी दिनुभयो ।

वडा अध्यक्ष पुनका अनुसार आगलागिबाट घरमा भएको लत्ता कपडा, भाडाकुडाँ, अन्नपात जलेको छ । मानविय क्षति भने भएको छैन ।

घरमा भिमबहादुरको नाती एक्लै भएको र परिवारका अन्य सदस्यहरु बाहिर भएको बेलामा आगलागि भएको बताईएको छ । घरमा आगलागी भएको देखेपछि स्थानीयले बच्चालाई घरबाट बाहिर निकालेका थिए ।

भिमबहादुरको परिवारले घर नजिकै रहेको गोठमा भान्सा गर्दे आएका थिए । त्यो गोठबाट सल्किएको आगो घरमा लागेको हुनसक्ने अनुमान गरिएको छ ।

अहिले आगो नियन्त्रणमा आईसकेको वडाध्यक्ष पुनले बताउनुभयो । भिमबहादुरको परिवारलाई तत्कालको लागि वडा कार्यालयले ५० किलो चामल, एक पेटी तेल, ५ किलो दाल, दुई किलो नुन उपलब्ध गराइएको छ ।