रुकुम पूर्वको सिस्ने गाउँपालिकाले सञ्चालन गरेको पालिकास्तरीय तेस्रो राष्ट्रपति रनिङ शिल्डमा रुक्मिणी माविले प्रथम स्थान हाँसिल गरेको छ । सिस्ने गाउँपालिका वडा नम्बर ५ मा रहेको रुक्मिणी माविले ९ स्वर्णसहित ३ रजत र ६ कास्यसहित १७ पदक जितेर प्रथम स्थान हाँसिल गर्दै शिल्ड हात पारेको हो ।

यस्तै सिस्ने गाउँपालिका वडा नम्बर ६ मा रहेको त्रिभुवन जनता मावि छिप्रीदह दोस्रो भएको छ । उसले ६ स्वर्णसहित एक रजत, २ कास्य गरी ९ पदक हात पार्दै दोस्रो स्थान हासिल गरेको सिस्ने गाउँपालिका शिक्षा युवा तथा खेलकुुद शाखाका प्राविधिक सहायक नरेन्द्र ओलीले जानकारी दिनुभयो ।

उहाँकाअनुसार ५ स्वर्ण, एक रजत र ४ कास्यसहित १० पदक जितेर सिस्ने २ नम्बर वडामा रहेको हिमालय मावी नयागाड तेस्रो स्थान हासिल गर्न सफल भएको छ भने ३ स्वर्ण, १० रजत र ४ कास्यसहित १७ पदक जितेर वडा नम्बर ३ मा रहेको जनता मावि पोखराले सान्त्वना स्थान हासिल गर्न सफल भएको छ ।

चैत्र १० गतेबाट रुक्मिणी माविमा सञ्चालन गरिएको शिल्डमा गाउँपालिका भित्रका १० वटा विद्यालयले भाग लिएका थिए । तीन दिन चलेको शिल्ड शान्त र सौहार्दपूर्ण वातावरणमा सम्पन्न भएको आयोजकले जनाएको छ । शिल्डमा भलिबल, दौडतर्फ २००, ४००, ८००, १५०० र ३०० मिटरको र हाइजम्प, लङजम्प, त्रिपलजम्प, ज्याब्लिङ थ्रो लगाएतका प्रतियोगिताहरु सञ्चालन गरिएको प्राविधिक सहायक ओलीले बताउनुभएको छ ।

आजै सिस्ने गाउँपालिका अध्यक्ष कुमारी बरालको अध्यक्षतामा भएको शिल्ड समापन कार्यक्रममा प्रतिनीधि सभा सदस्य कमला रोकाको प्रमुख आतीथ्यता रहेको थियो ।

कार्यक्रममा विभिन्न वडाका वडाध्यक्ष, विद्यालय व्यवस्थापन समिति, शिक्षक, अभिभावक संघ, विद्यार्थीलगाएत खेलाडी तथा खेलप्रेमीहरुको उपस्थिती रहेको थियो । कार्यक्रमको सञ्चालन रुक्मिणी माविका शिक्षक घनश्याम दाहालले गर्नुभएको थियो ।