रुकुम पश्चिम / जिल्ला प्रशासन कार्यालय रुकुम पश्चिमले नेत्र बिक्रम चन्द नेतृत्वको नेकपाका ३२ जना कार्यकर्ता बिरुद्धको मुद्धा किनारा लगाएको छ । तत्कालिन अवस्थामा प्रतिबन्धित नेकपा बिप्लव समुहका नेता कार्यकर्ताहरुलाई लगाईएका मुद्धाहरु प्रमुख जिल्ला अधिकारी परमानन्द घिमिरेको इजलासले टुङग्याएको हो ।

प्रमुख जिल्ला अधिकारी परमानन्द घिमिरेले बिप्लव कार्यकर्ता माथीका १८ थान मुद्धा टुङग्याईएको बताउँनुभयो । उहाँले लामो समयदेखि थन्किएर रहेका ती मुद्धाहरु गृह मन्त्रालयको निर्देशन अनुसार किनारा लगाईएको जनाउँनुभयो । प्रजिअ घिमिरेले जिल्ला सरकारी वकिल कार्यालसँगको आवश्यक समन्वयमा ती मुद्धाहरु फैसला गरी टुङग्याईएको जानकारी दिनुभयो । १८ थान मुद्धामा ३२ जना विप्लव कार्यकता प्रतिवादी रहेका थिए ।

१८ थान मुद्धा मध्य १७ थान सार्वजनिक हित, स्वास्थ्य, सुरक्षा, सुविधा र नैतिकता बिरुद्धको कसुर (अभद्र व्यवहार) सम्बन्धिका र एक थान केहि सार्वजनिक अपराध मुद्धा शिर्षकका मुद्धा हुन् । चन्दा असुली गरेको, धाकधम्की दिएको, आक्रमण गरेको, जनप्रतिनिधिको सार्वजनिक बेइज्यती गरेको, सरकार बिरुद्ध लागेको लगायतका आरोप सहित मुद्धा चलाईएको थियो । फैसलामा अधिकांश मुद्धा जरिवाना मार्फत किनारा लगाईएको हो ।

सरकारले तत्कालिन अवस्थामा नेकपालाई प्रतिबन्ध लगाएपछि उक्त समुहका नेता कार्यकर्ताहरु भूमिगत अवस्थामा रहेका थिए । उनीहरुलाई बिभिन्न स्थानबाट पक्राउ गरेर मुद्धा चलाईएको थियो । प्रतिबन्ध फुकुवा भएको लामो समय बितिसक्दा पनि कार्यकर्ताहरु पटक पटक तारेख थाम्न आउँनु परेको भन्दै गुनासो गरिरहेका थिए । राजनीतिक आस्थाकै आधारमा पक्राउ परेर मुद्धा खेपिरहेका नेकपाका कार्यकर्ताहरु मुद्धा टुङिगएपछि खुशि भएका छन् ।