रुकुम पूर्व / 'अर्गानिक उत्पादन : भूमेको पहिचान' भन्ने नारालाई जोड दिएको रुकुम पूर्वको भूमे गाउँपालिकाले आर्थिक विकासको मुख्य माध्याम कृषिलाई लिएको जनाएको छ ।

कृषिको क्षेत्रमा उल्लेखनिय कार्य गरेको गाउँपालिकाले आज आईतबार उत्कृष्ट कार्यहरु सार्वजनिक गर्ने क्रममा कृषि क्षेत्रलाई आर्थिक विकासको मुख्य क्षेत्र तय गरेको जानकारी गराएको हो ।

गाउँपालिकाले पहिलो स्थानीय सरकारले हालसम्म सम्पादन गरेका कार्य प्रगतिहरु सार्वजनिक गर्ने क्रममा प्रमुख प्रशासकीय अधिकृत चन्द्रसिं श्रेष्ठले आर्थिक विकासका लागि कृषि क्षेत्रमा गरेका उल्लेखनिय कार्यहरु जानकारी गराउनुभएको हाे ।

स्थानीय सरकारको आधार वर्षमा व्यवसायीक कृषि गर्ने किसानहरुको तथ्यांक नभएको तर अहिले गाउँपालिकाका १४६ परिवार व्यवसायीक कृषिमा लागेको बताईएको छ । गाउँपालिकामा तरकारी र फलफुल व्यवसायको राम्रो सम्भावना गरेकोले कृषक लक्षित कार्यक्रम सञ्चालन गरिएको गाउँपालिकाले जनाएको छ ।

उहाँले रैथाने बाली उत्पादनमा अनुदान दिनुका साथै मागमा आधारित अनुदान कार्यक्रम सञ्चालन गरेर कृषि उत्पादनको लागि गाउँपालिकाले काम गरेको प्रमुख प्रशासकीय अधिकृत श्रेष्ठले उल्लेख गर्नुभयो । गाउँपालिकामा मारिङ एकीकृत कृषि अनुसन्धान केन्द्र स्थापना गरेको जानकारी दिनुहुँदै उहाँले गाउँपालिकाको दुई स्थानमा (खाबाङबगर र चुनबाङ) कृषि उपज सङ्कलन तथा भण्डारण केन्द्र निर्माण गरिएको बताउनुभयो ।

मारिङ बहुउद्देश्यीय सहकारी संस्थाद्वारा सञ्चालन गर्ने गरी सहकारी बजार स्थापना गरिएकोले उक्त कार्य नमुना योग्य रहेको छ । गाउँपालिकाले कृषि उपजको संकलन तथा भण्डारणका लागि गाडीको व्यवस्था र व्यवसायिक कृषितर्फ आकर्षण वृद्धि गर्न महत्वपूर्ण काम गरेको बताएको छ ।

गाउँपालिकाको वडा नम्वर १,२, ६ र ७ मा आलु पकेट क्षेत्र, वडा नम्वर ३,४, ५ र ६ मा केरा पकेट क्षेत्र, वडा नम्वर ४, ५ र ८ मा सुन्तला र गाउँपालिकाको अन्य स्थानमा तरकारी बालीको पकेट क्षेत्र स्थापना गरेर कृषि मार्फत आर्थिक विकास गरेको गाउँपालिकाले जानकारी दिएको छ ।

एक घर एक करेसाबारी निर्माण कार्यक्रम, एक घर १० फलफूल विरुवा रोपन अभियान सञ्चालन गरेको गाउँपालिकाले महिला कृषि सहकारी मार्फत उन्नत गहुँ बीउको स्रोत केन्द्र समेत स्थापना गरेको छ ।

कार्यक्रममा गाउँपालिका अध्यक्ष रामसुर बुढाले बिभिन्न अवसर र चुनौतिको सामना गर्दै गाउँपालिका यहाँसम्म आएको बताउँनुभयो । उहाँले जग कस्तो बनाउने भन्ने कुरामा अध्ययन गर्दै गर्दा विभिन्न चरण पार गरेर गाउँपालिकाको विकासको लागि सक्दो गरेको उल्लेख गर्नुभयो । सरकारले गरेका कामहरु जनतालाई जानकारी गराउनु महत्वपूर्ण रहेकोले आज पहिलो कार्यकालमा सम्पादन गरेका प्रगतिहरु सार्वजकि गरेको अध्यक्ष बुढाले बताउनुभयो ।

गाउँपालिकाको कार्यालयमा जिल्लाका विभिन्न राजनीतिक दलहरु, पत्रकारहरु, स्थानीय बुद्धिजिवी तथा सर्वसाधारणहरुको उपस्थितिमा प्रगति विवरण सार्वजनिक गरिएको हो ।