रुकुम पूर्व / रुकुम पूर्वको भुमे गाउँपालिकाले आर्थिक वर्ष २०७८/७९ अन्तर्गत दोस्रो चौमासिकको सार्वजनिक सुनुवाई सम्पन्न गरेको छ । आज पालिकाको वडा नम्बर ४ र ५ लाई लक्षित गरि ४ नं.वडाको काँडामा रहेको स्वास्थ्य चौकीमा सार्बजनिक सुनुवाइ गरिएको हो ।

सार्वजनिक सुनुवाइका क्रममा प्रमुख प्रशासकीय अधिकृत चन्द्रसिंह श्रेष्ठले गाउँपालिकाले यो चौमासिक अबधिभर गरेका विभिन्न गतिविधिहरुको प्रतिबेदन प्रस्तुत गर्नुभएको थियो ।

गाउँपालिकामा सेवा लिन आएका सेवाग्राहीहरुबाट विभिन्न सूचकहरुमा सेवा प्रवाहको प्रभावकारिता सर्वेक्षण गरिएको प्रमुख प्रशासकीय अधिकृत श्रेष्ठले प्रतिबेदन मार्फत जानकारी गराउनुभयो । साथै सर्बेक्षणबाट नागरिकको जवाफ सकारात्मक पाइएको समेत उहाँले बताउनुभयो ।

सर्बेक्षणबाट भेटिएका नागरिकका असन्तुष्टिहरुलाई पहिचान गरि त्यसको समाधान खोजिने गाउँपालिका अध्यक्ष रामसुर बुढाले बताउनुभयो । प्रत्येक चौमासिकमा सार्वजनिक सुनुवाइ कार्यक्रम गरिएता  पनि पालिकाको केन्द्रमा गरिने कार्यक्रमले वास्तविक रुपमा नागरिकहरुको आवाज नसमेटिने भएकाले जनताको गाउँघर सम्मै गएर सार्वजनिक सुनुवाइ गरिएको समेत बुढाले जानकारी गराउनुभयो ।

सार्वजनिक सुनुवाइका क्रममा नागरिकले कृषि, स्वास्थ्य र सडक पुर्वाधार लगायत बिभिन्न बिषयमा गुनासोहरु राखेका थिए । आएका गुनासोहरुको जवाफ गाउँपालिका अध्यक्ष बुढा, उपाध्यक्ष मनकुमारी बुढा बिष्ट, प्रमुख प्रशासकीय अधिकृत श्रेष्ठ, स्वास्थ्य शाखा प्रमुख उपेन्द्र यादव र पुर्वाधार शाखा प्रमुख सन्तोष घर्ती लगाएत विभिन्न शाखाका प्रमुख तथा प्रतिनिधि ले दिनु भएको थियो ।