सोसल मिडिया
रुकुम पश्चिम / नेकपा एमाले रुकुम पश्चिमले आगामी बैशाख ३० गते हुने स्थानीय तह निर्वाचनको लागि उम्मेदवार टुंगो लगाएको छ ।
आज बुधबार जिल्लाको बागबजार स्थित पार्टी कार्यालयमा बसेको पार्टीको बैठकले जिल्लाका तीन नगरपालिकाको प्रमुख र उपप्रमुख र तीन गाउँपालिकाको अध्यक्ष र उपाध्यक्षको लागि उम्मेदवार टुंगो लगाएको हो । टुंगो लगाएका उम्मेदवारहरुलाई चुनावको टिकटको लागि प्रदेश कार्यालयमा सिफारिस गरिने बताईएको छ ।
नेकपा एमाले रुकुम पश्चिमका प्रचार विभाग प्रमुख कर्णबहादुर ओलीका अनुसार मुसिकोट नगरपालिकाको प्रमुखमा थलबहादुर ओली र उप प्रमुखमा चन्द्री महतरालाई उम्मेदवार सिफारिस गरिएको छ ।
चौरजहारी नगरपालिकाको नगर प्रमुख पदको लागि टंक प्रसाद ओली र उपप्रमुख पदको लागि डण्डी कार्कीलाई उम्मेदवार बनाउने निर्णय भएको छ ।
त्यसैगरी आठबिसकोट नगरपालिकामा दिनेश चन्दलाई नगर प्रमुख र कृष्णा कुमारी मल्लाई उपप्रमुख पदको उम्मेदवार सिफरिस गरिएको छ ।
जिल्लाको सानीभेरी गाउँपालिकाको अध्यक्ष पदको लागि युवा नेता प्रकाश खड्का र उपाध्यक्ष पदमा पवित्रा डाँगीलाई सिफारिस गर्ने निर्णय भएको छ ।
त्रिवेणी गाउँपालिकामा अध्यक्ष पदको लागि डिल्लीबहादुर ओली र उपाध्यक्ष पदको लागि धनकला बिष्टलाई उम्मेदवार सिफारिस गरिएको छ ।
त्यसैगरी बाँफिकोट गाउँपालिकाको अध्यक्ष पदको उम्मेदवारमा गणेश बहादुर केसी र उपाध्यक्ष पदमा देउमी पौडेललाई सिफारिस गर्ने निर्णय गरिएको प्रचार विभाग प्रमुख ओलीले जानकारी दिनुभयो ।
