रुकुम पूर्व / रुकुम पूर्वको भूमे गाउँपालिका अध्यक्षको लागि उम्मेदवारी दिनुभएका एक जनाले उम्मेदवारी फिर्ता लिनुभएको छ । स्थानीय तह निर्वाचनमा नेपाली कांग्रेस र नेकपा एमालेको तालमेलबाट रुकुम पूर्वको भूमे गाउँपालिका अध्यक्षमा उम्मेदवारी दिनुभएका भिमबहादुर ओलीले उम्मेदवारी फिर्ता लिनुभएको हो ।

निर्वाचन अधिकृतको कार्यालयका अनुसार कांग्रेसको तर्फबाट गाउँपालिका अध्यक्षका उम्मेदवारी दिएका ओलीले उम्मेदवारी फिर्ता लिनुभएको हो ।

कांग्रेसको तर्फबाट अध्यक्ष र एमालेको तर्फबाट उपाध्यक्षमा उम्मेदवारी दिने कांग्रेस–एमालेको निर्णयअनुसार ओलीले कांग्रेसको तर्फबाट अध्यक्षमा उम्मेदवारी दिनुभएको थियो ।
उम्मेदवारी फिर्ता लिने ओली मनोनयन अघि ओली नेकपा माओवादीकै स्थानीय नेता हुनुहुन्थ्यो । माओवादी पार्टीले टिकट नदिएपछि अन्याय गरेको भन्दै स्वतन्त्र उम्मेदवारी दर्ता गर्न मनोनयन दर्ताको दिन निर्वाचन अधिकृतको कार्यालय पुगेको बेला काँग्रेस एमालेसँग सल्लाह मिलेर उम्मेदवारी दिनुभएको थियो ।

कांग्रेस–एमालेको प्रस्तावमा कांग्रेसको चुनाव चिह्नबाट उम्मेदवारी दिएको तर छलफल गर्दै जाँदा आफू उम्मेदवारी फिर्ता लिने निर्णयमा पुगेको उहाँले बताउँनुभयो ।

ओलीले उम्मेदवारी फिर्ता लिएपछि गाउँपालिका अध्यक्ष पदमा अब माओवादी केन्द्रका होमप्रकाश श्रेष्ठ, राष्ट्रिय जनमोर्चाका कमान पुन र मंगल नेश्नल अर्गनाइजेसनका रतन पुनको मात्रै उम्मेदवारी छ ।

गाउँपालिकामा काँग्रेस उम्मेदवारविहिन

गठबन्धन भएको कारण गरेकाले कांग्रेसले उपाध्यक्षमा उम्मेदवारी दिएको थिएन । यससँगै भूमे गाउँपालिकामा नेपाली काँग्रेसको उम्मेदवारविहिन भएको छ । उपाध्यक्षमा एमालेको तर्फबाट उम्मेदवारी दिएका कमानसिङ डाँगीको मात्रै उम्मेदवारी कायम छ ।

निर्वाचन अधिकृतको कार्यालयका अनुसार भूमे गाउँपालिका उपाध्यक्ष पदको लागि नेकपा माओवादी केन्द्रका सविना बुढा मगर, नेकपा एमालेका कमानसिँह डाँगी र स्वतन्त्र रुपमा नमिता पुनले उम्मेदवारी दर्ता गराउनुभएको छ ।