सोसल मिडिया
रुकुम पश्चिमको आठबिसकोट नगरपालिका ३ खदिमा शुक्रबार राती नेकपा माओवादी केन्द्र र नेपाली काँग्रेसका कार्यकर्ता बिच झडप भएको छ । झडपको क्रममा प्रहरी सहित सात जना घाईते भएका छन् ।
अस्थायी प्रहरी पोष्ट स्यालाखदीका अनुसार दुई पक्षका कार्यकर्ताको झडप नियन्त्रणको क्रममा दुई जना प्रहरी घाईते भएका छन् । प्रहरी जवानद्वय बुद्धबहादुर थापा र चक्रबहादुर रोकाया घाईते भएको प्रहरीले जनाएको छ ।
दोहोरो झडपमा परेर माओवादी केन्द्रका तीन जना कार्यकर्ता घाईते भएका छन् । माओवादी केन्द्रको तर्फबाट वडा अध्यक्षको उम्मेदवार हुनुभएका केशरमान बिक, सोहि गाउँका तुल बहादुर बिक र सन्तोष बिक घाईते हुनुभएको हो । केशरमानको मुखमा, तुलबहादुरको खुट्टामा र सन्तोषको छातीमा चोट लागेको छ ।
त्यसैगरी नेपाली काँग्रेसका दुई जना कार्यकर्ता घाईते भएका छन् । आठबिसकोट ३ का सीता बोहरा र डिल्लीराज बोहरा घाईते हुनुभएको प्रहरीले जनाएको छ । उहाँहरु दुवैलाई सामान्य चोट लागेको बताईएको छ ।
दुवै पक्षका घाईतेहरुको स्थानीय मेडिकलमा उपचार गरिएको र अहिले अवस्था समान्य रहेको प्रहरीले जनाएको छ ।
