रुकुम पश्चिम / रुकुम पश्चिममा मिडिया र स्थानीय तहको अन्तरसम्बन्ध बिषयमा अन्तरक्रिया गरिएको छ । नेपाल पत्रकार महासंघ रुकुम शाखाले जिल्लाका पालिका प्रमुख र उपप्रमुख, अध्यक्ष तथा उपाध्यक्षहरुसँग अन्तरक्रिया कार्यक्रम गरेको हो ।

स्थानीय सरकार र पत्रकारहरु बीचको सम्बन्ध र स्थानीय सरकारले बनाउने नीति र कार्यक्रमलाई लक्षित गरेर कार्यक्रम आयोजना गरिएको पत्रकार महासंघका अध्यक्ष लक्ष्मण केसीले बताउनुभयो । उहाँका अनुसार कार्यक्रममा स्थानीय तहका नवर्निाचित प्रमुख र उपप्रमुख, अध्यक्ष तथा उपाध्यक्षहरुलाई बधाई ज्ञापनसँगै अन्तरसम्बन्धबारे छलफल गरिएको छ ।

कार्यक्रमममा आहा सञ्चार साप्तहिकका सम्पादक मेगराज खड्काले स्थानीय सरकार, मिडिया र गर्नुपर्ने काम विषयक कार्यपत्र प्रस्तुत गर्नुभएको थियो । कार्यपत्रमा पत्रकार खड्काले रुकुमको पत्रकारिताको विकास, सम्भावना र समस्या, स्थानीय सरकार र मिडियाको अधिकार, स्थानीय सरकार र मिडिया आफैले गर्नुपर्ने कामहरुको विवरण समावेश गर्नुभएको थियो ।

सहभागीपत्रकारहरुले कार्यपत्रमा प्राप्त सुझाव अनुसार स्थानीय तहले नीति तथा कार्यक्रम बनाउन माग गरेका छन् । उनीहरुले मिडियामैत्री भएमा स्थानीय सरकार र समग्र जिल्लाकै प्रचार हुनेमा विचार व्यक्ति गरेका छन् । उनीहरुले सूचना प्रवाहलाई सहज बनाउन समेत आग्रह गरेका छन् ।

कार्यक्रममा सहभागि जिल्लास्थित स्थानीय तहका प्रमुख, अध्यक्ष, उपप्रमुख र उपाध्यक्षले सूचना प्रवाहमा कुनै कञ्जुस्याईं नगर्ने र सञ्चारमाध्यमहरुको विकासका लागि सहयोग गर्ने प्रतिबद्धता जनाएका छन् । यसका लागि बेला बेलामा छलफल, भेटघाट र समन्वयको पाटोलाई प्रभावकारी रुपमा अगाडी बढाउने समेत बताईएको छ ।

कार्यक्रममा चौरजहारी नगरपालिकाका प्रमुख पुष्प वादी, सानीभेरी गाउँपालिका अध्यक्ष विर्खबहादुर बिष्ट, बाँफिकोट गाउँपालिका अध्यक्ष जनककुमार बाँठा, त्रिवेणी गाउँपालिका अध्यक्ष गणेशकुमार केसी, चौरजहारी नगरपालिका उपप्रमुख इश्वरीकुमारी शर्मा विएम, सानीभेरी गाउँपालिका उपाध्यक्ष कमला रोका, त्रिवेणी गाउँपालिका उपाध्यक्ष राजकुमारी रेउले, प्रमुख जिल्ला अधिकारी परमानन्द घिमिरे, प्रहरी प्रमुख बिष्णुप्रसाद सोती, सशस्त्र प्रहरी प्रमुख प्रेमसिंह धामी, नेपाल पत्रकार महासंघका सस्थापक अध्यक्ष नारायण कुमार शाह, सस्थापक सचिव हरिबिष्णु ओली, मानव विकास तथा सामुदायिक सेवा अन्तरगत मातृ तथा बाल स्वास्थ्य प्रर्वद्धन कार्यक्रमका जनस्वास्थ्य अधिकृत गोपाल तिमल्सिना लगायतको आतिथ्यता रहेको थियो ।

नेपाल पत्रकार महासंघका अध्यक्ष लक्ष्मण केसीको अध्यक्षता तथा उपाध्यक्ष गोपाल रेग्मीको स्वागत मन्तव्य रहेको कार्यक्रमको संचालन सचिव हिरा परियारले गर्नुभएको थियो ।