सोसल मिडिया
रुकुम पश्चिम / रुकुम पूर्वको सिस्ने गाउँपालिका १ मा रहेको सिस्ने हिमाल पुग्नको लागि तय गरिएको सिस्ने राउण्डमा आठ वटा आधुनिक काठेपुल निर्माण गरिएको छ । रुकुम पश्चिमको आठबिसकोट नगरपालिका क्षेत्रमा तीन वटा, बाँफिकोट गाउँपालिका क्षेत्रमा तीज वटा र रुकुम पूर्वको सिस्ने गाउँपालिका क्षेत्रमा दुई वटा आधुनिक काठेपुल निर्माण गरिएको हो ।
जीविकोपार्जन पुनरुत्थानका लागि दिगो पर्यटन परियोजनाले स्थानीय तहसँगको सहकार्यमा पुलहरु निर्माण गरेको हो । कोरोना कारण सुस्ताएको पर्यटनलाई चलायमान बनाउन र परेको असरलाई सम्बोधन गर्न आधुनिक काठे पुलको अवधारणा ल्याएर कार्यान्वयन गरिएको परियोजनाका जीविकोपार्जन विज्ञ धर्म दवाडिले बताउनुभयो । पर्यटनकर्मीहरुको सहभागिता रहने गरेर यस्तो योजना अघि सारेको उहाँले जनाउनुभयो ।
आठबिसकोट नगरपालिका १ को देउतीखोला, ६ नम्वर वडाको रिजागाड खोला र मल्ल्लीखाना खोलामा आधुनिक काठेपुल निर्माण गरिएको छ । त्यसैगरी रुकुम पूर्वको सिस्ने गाउँपालिका १ स्थित ठुलाभेरा खोला र सानाभेरा खोलामा पनि उक्त पुल बनाईएको छ । रुकुम पश्चिमको बाँफिकोट गाउँपालिका ४ बडगाड खोला र ज्यामिरखोला, वडा नम्बर १० को भङखोलामा पुल निर्माणको अन्तिम काम चलिरहेको छ । जीविकोपार्जनका लागि दिगो पर्यटन परियोजना, स्थानीय तह र जनश्रमदान सहित ६ लाख बराबरको रकममा एउटा पुल निर्माण भएको परियोजनाले जनाएको छ । यी आधुनिक काठेपुलहरुको करिब २५ बर्षको आयु रहने परियोजना जीविकोपार्जन विज्ञ दवाडिले बताउनुभयो ।
आधुनिक काठे पुल निर्माणको कामले थला परेको पर्यटनलाई उकास्न र आकर्षण बढाउन महत्वपूर्ण भूमिका खेल्ने बाँफिकोट गाउँपालिका २ का मनबहादुर खत्रीले बताउनुभयो । पर्यटनकर्मी समेत रहनुभएका खत्रीका अनुसार सस्तो, पर्यटनमैत्री र स्थानीय श्रोतको प्रयोग मार्फत आधुनिक काठेपुलहरु निर्माण भएकाछन् । यी पुलहरुले आन्तरिक तथा बाह्य पर्यटनकर्मीहरुलाई आकर्षण समेत गरेका छन् ।
सिस्ने राउण्डमा सरकारको लगानी सुरु
पुल निर्माणको काममा मध्यस्थता गरिरहनुभएका पर्यटनकर्मी मनबहादुर खत्रीले सिस्ने राउण्डमा सरकारले लगानी सुरु गरेको बताउनुभयो । उहाँले लामो समयसम्मको समन्वय तथा सहकार्यपछि स्थानीय सरकारले लगानी सुरु गरेकोमा खुशि व्यक्ति गर्नुभयो । उहाँले जीविकोपार्जनका लागि दिगो पर्यटन परियोजनाले अघि सारेको आधुनिक काठे पुल निर्माणको सह लगानीसँगै अब स्थानीय सरकारले पर्यटन क्षेत्रमा लगानी गर्ने विश्वास जागेको बताउनुभयो ।
सिस्ने हिमाल पुग्न तीन ओटा बाटोको परिकल्पना गरेर सिस्ने राउण्ड तयार गरिएको हो । रुकुम पश्चिमको आठबिसकोट, बाँफिकोट र रुकुम पूर्वको सिस्ने गाउँपालिका क्षेत्रबाट सिस्ने राउण्ड सुरु गर्न सकिने खत्रीले बताउनुभयो । ‘हामी सिस्ने राउण्डको नक्शाको काम चाँडै टुंग्याउँदै छौ,’ खत्रीले भन्नुभयो, ‘सिस्ने राउण्डमा ८० देखि ९० किलोमिटर दुरी पर्छ ।’ उहाँले सिस्ने राउण्डको ३० स्थानमा पुलको आवश्यकता रहेको समेत उल्लेख गर्नुभयो ।
