रुकुम पूर्व / बर्षायाम सुरु भएसँगै रुकुम पूर्वका ग्रामिण सडकहरु अवरुद्ध भएका छन् । ट्रयाक खोलिएका कच्चि सडकहरुमा आएको पहिरो र बढेको नदि तथा खोलाको कारण सडक यातायात अवरुद्ध भएको हो ।

पुथा उत्तरगंगा गाउँपालिकाको वडा नम्वर १० र ११ मा पर्ने उत्तरगंगा नदिमा पानीको बहाव बढेर जिल्ला सदरमुकाम रुकुमकोट र पालिकाको केन्द्र तकमा आउने यातायातका साधनहरु ठप्प भएका छन् । नदिमा पुल नहुँदा ११ नम्वर सेरामा रहेका गाडिहरु सेरामै रहेको गाउँपालिकाका सब इन्जिनियर नबिन दाहालले जानकारी दिनुभयो । नदिकै बहावको कारण वडा नम्वर १, २, ३, ४, ५, ६ र ९ का सर्वसाधरणहरु गाउँपालिकाको केन्द्रसम्म जानबाट बञ्चित भएका छन् ।

बर्षाको कारण निर्माणाधिन अवस्थामा रहेको सहिद मार्गको रुकुम पूर्व खण्ड नियमित सञ्चालन हुन सकिरहेको छैन । भुमे गाउँपालिका र पूथा उत्तरगंगा गाउपालिकाको सिमानामा पर्ने रिका लेकमा नियमितजसो पहिरो झरिरहेकोले यातायातका साधन सञ्चालनमा कठिनाई हुने गरेको छ । जसको कारण काँक्रिबाट तक हुँदै हुकाम जाने यात्रुहरु मर्कामा परेका छन् । सोहि सडकहुँदै पुथा उत्तरगंगाबाट जिल्ला सदरमुकाम रुकुमकोट आउने सर्वसाधारणले सास्ती पाउने गरेका छन् ।

जिल्लाको सिस्ने गाउँपालिका २ का पूर्व वडा अध्यक्ष जीवन केसीले जिल्लाका धेरैजसो ठाउँमा रहेका कच्चि सडकहरु बर्षायाममा बन्द अवस्थामा हुने बताउनुभयो । उहाँले बर्षा सुरुभएसँगै जिल्लाको भूमे गाउँपालिका ५ वाबाङमा आएको पहिरोेले रुकुमकोट – बालुका – देउखोला सडक बन्द भएको बताउनुभयो ।

त्यसैगरी रुकुम पश्चिमको मुसीकोट देखि रुकुम पूर्वको सदरमुकाम बीचको धाउनेमा लगातार पहिरो जाने गरेकोले बाटो बन्द भैरहेको समस्या रहेको उहाँले उल्लेख गर्नुभयो । त्यसैगरी क्युवाङ राङसी जामाबगर र नाखामा खोलिएको ग्रामिण सडक पनि बर्षाको कारण अवरुद्ध रहेको बताईएको छ ।