सोसल मिडिया
रुकुमपूर्व / रुकुमपूर्वको सिस्ने गाउँपालिकाले लुम्बिनी प्रदेशमै पशिलो पटक पूर्वाधार एम्बुलेन्स सेवा सञ्चालनमा ल्याएको छ । गाउँपालिकाले बर्षाको समयमा हुने विपत्तीको प्रतिकार गर्ने उद्धेश्यले पूर्वाधार एम्बुलेन्स सेवा सञ्चालनमा ल्याएको हो ।
सिस्ने गाउँपालिका अध्यक्ष कृष्ण रेग्मीले गत साताबाट सुरु गरिएको पूर्वाधार एम्बुलेन्स सेवामार्फत कामकाज पनि सुरु भइसकेको बताउनुभयो । बर्षातको समयमा आउने विपद र विभिन्न समस्याहरुलाई मध्यनजर गर्दै गाउँपालिकाले पुर्वाधार एम्बुलेन्स सेवा संचालनमा ल्याईएको अध्यक्ष रेग्मीले उल्लेख गर्नुभयो ।
उहाँले विपद प्रभावित क्षेत्रका नागरिकले पुर्वाधार टोलिलाई सम्पर्क गर्न अनुरोध गर्नुभयो । सार्वजनिक महत्वका स्थानलाई पहिलो र अन्यलाई दोस्रोमा राखेर विपद प्रतिकार्यमा लाग्न अध्यक्ष रेग्मीले निर्देशन दिएको बताउनुभयो ।
गाउँपालिका उपाध्यक्ष गोपाल रेउलेका अनुसार उक्त सेवाको लागि ६ जनाको टोली परिचालन गरिएको छ । एक जना प्राविधिक सहित ट्याक्टर र जेसीबीका एक–एक जना चालक र अन्य तीन जना श्रमिक विपद व्यवस्थापनका लागि खटाइएको छ । यो टोलिले विशेष गरि गाउँपालिका भित्रका विभिन्न ठाउँमा जाने बाढि र पहिरोको अल्पकालीन व्यवस्थापनको काम गर्नेछ ।
यस्तै उद्धार, क्षतिको विवरण संकलन र सडक पुगेको ठाउँमा यातायात अवरुद्ध भए सुचारु गर्ने काम पनि गर्ने भएको छ । साउन र भदौ दुई महिनाको लागि यो सेवा सुचारु गरिएको उपाध्यक्ष रेउलेले बताउनुभयो । सेवा प्रभावकारी भएमा थप गरिने समेत उहाँले उल्लेख गर्नुभयो ।
सिस्ने गाउँपालिका भित्रका आठ वटा वडा मध्य ३, ४, ५, ६, ७ र ८ नम्बर वडा पहिरो उच्च जोखिममा रहेका छन ।
