सोसल मिडिया
रुकुमपूर्व / आसन्न संघ र प्रदेश सभा निर्वाचनलाई मध्यनजर गर्दै रुकुम पुर्वमा १० वटा मतदानस्थल थप गर्नको लागि सिफारिस गरिएको छ । बिहिबार बसेको जिल्ला मतदानस्थल तथा मतदान केन्द्र सिफारिस समितिको बैठकले जिल्लामा १० वटा मतदानस्थल थप गर्नको लागि निर्वाचन आयोगमा सिफारिस गर्ने निर्णय गरेको हो ।
समितिका संयोजक एवम् रुकुम पुर्वका प्रमुख जिल्ला अधिकारी तुलाराज सुनुवारले अध्यक्षतामा बसेको समितिको बैठकले पुथा उत्तरगंगा गाउँपालिकाको चार स्थान, भूमे गाउँपालिकाको चार स्थान र सिस्ने गाउँपालिकाको दुई स्थानमा मतदानस्थल थप गर्नको लागि सिफारिस गर्ने निर्णय गरेको हो ।
जिल्ला निर्वाचन अधिकारी तेजकुमार ओलीका अनुसार पुथा उत्तरगंगा गाउँपालिकाको वडा नम्वर २ स्थित हार्दिबाङ, ५ नम्वर स्थित काजरजङ, ७ नम्वरको जाङ र ११ नम्वरको दमचनमा मतदानस्थल थप गर्न सिफारिस गरिएको छ ।
जिल्ला मतदानस्थल तथा मतदान केन्द्र सिफारिस समितिका सदस्य सचिव समेत रहनुभएका ओलीले भूमे गाउँपालिकाको वडा नम्वर ६ स्थित नाखे, ७ नम्वरको गुनाम, ८ नम्वरको कुचिबाङ र ९ नम्वर वडाको सिमचौरमा मतदानस्थल थप गर्न सिफारिस गरिएको बताउनुभयो । त्यसैगरी सिस्ने गाउँपालिकाको वडा नम्वर १ स्थित भट्टेचौर र ७ नम्वर वडा स्थित नाथिगारमा पनि मतदानस्थल थपको लागि सिफारिस गर्ने निर्णय भएको छ ।
जिल्लास्थित राजनीतिक दलका प्रमुख, निर्वाचन कार्यालय, स्थानिय तहका प्रमुखहरु, सुरक्षा निकायका प्रमुखहरुको सम्मिलित बैठक बैठकले यस्तो निर्णय गरेको हो । यस अघि पुथा उत्तरगंगा गाउँपालिकाको बिभिन्न गाउँबाट मतदान स्थल आईपुग्न करिब ६ घण्टा हिडेर आउनुपर्ने बाध्यता रहेको छ । हार्दिबाङ, काजरजङ, जाङ, दमचन गाउँका मतदाता मतहाल्न आउँदा बास बस्नुपर्ने बाध्यता रहेको छ । भूमे र सिस्ने गाउँपालिकाका मतदानस्थलमा भने करिब ३ घण्टा पैदल हिडेर मतदान गर्न आउने गरेका छन् ।
जिल्लामा स्थानीय तह निर्वाचनको लागि ३५ वटा मतदानस्थल र ४९ वटा मतदान केन्द्र कायम गरिएको थियाे । निर्वाचन आयोगमा सिफारिस गरिएका १० मतदानस्थल स्विकृत भएमा रुकुम पूर्वमा ४५ वटा मतदानस्थल रहनेछन् ।
