सोसल मिडिया
रुकुम पश्चिम / रुकुम पश्चिमको चौरजहारी नगरपालिका १ मा स्थापना गरिएको यातायात व्यवस्था सेवा कार्यालय स्थापना भएदेखि हालसम्म कामविहिन अवस्थामा रहेको छ । कार्यालय खोलिएको तीन वर्ष पुग्न लाग्दा पनि कार्यालयले सेवा प्रवाह गर्न सकिरहेको छैन । कार्यालय स्थापनाको सुरुको दुई वर्ष कार्यादेश नपाईको र गत वर्ष कार्षदेश पाएर पनि कर्मचारी नहुँदा सेवा प्रवाह हुन नसकेको कार्यालयले जनाएको छ ।
कार्यालयका निमित्त प्रमुख प्रदिपकुमार रेग्मीले आवश्यक जनशक्ति नहुँदा कार्यालय खोल्ने, दिनभरि कुर्ने र बन्द गर्ने काम मात्र भइरहेको बताउनुभयो । काम गर्ने रहर र इच्छा शक्ति हुँदाहुदै चाहिने जनशक्ति नहुँदा कामविहिन हुनुपरेको रेग्मीको भनाई छ । ‘तामझामका साथ कार्यालय खोलेको तीन बर्ष बित्न थाल्यो,’ निमित्त प्रमुख रेग्मीले भन्नुभयो, ‘सुरुका दुई वर्ष कार्यादेश पाईएन, कार्यादेश र बजेट व्यवस्थापन भएपछि कर्मचारी पाईएको छैन ।’
सात जनाको दरबन्दी भएको कार्यालयमा अहिले दुई जना मात्र नियमित कर्मचारी छन् । निमित्त कार्यालय प्रमुख र कार्यालय सहयोगीले कार्यालय कुरेर कस्ने काम भैरहेको रेग्मीले उल्लेख गर्नुभयो । सुरुका दुई वर्ष कार्यादेशका लागि पटकपटक कर्णाली प्रदेशको यातायात निर्देशनालय, पूर्वाधार कार्यालय, मुख्यमन्त्रीको कार्यालय लगायतमा आग्रह, पत्राचार गरेपछि गत वर्ष मात्र कार्यादेश पाईएको उहँको भनाई छ ।
चौरजहारी नगरपालिका १ मा २०७६ भदौ २६ मा कार्यालयको स्थापना गरिएको थियो । तीन वर्षसम्म पनि कार्यालयबाट कुनैपनि सेवा प्रवाह भएको छैन । काम नहुँदा खटाईएका कर्मचारीहरु हाजिर लगाएर कार्यालय समय बिताउन बाध्य भएका छन् । हाजिर भएका कतिपय कर्मचारीहरू सरुवा मिलाउँदै अन्यत्र जान थालेका छन् भने सेवाग्राहीहरू सुर्खेत, दाङ र नेपालगन्ज गएर सेवा लिन बाध्य छन् ।
कार्यालयमा उपसचिव, अधिकृत, नायब सुब्बा, खरिदार, कम्प्युटर अपरेटर र कार्यालय सहयोगी सहित सात जनाको दरबन्दी छ । सुरुमा दरबन्दी अनुसारका कर्मचारी कार्यालय आएपनि हाजिर गरेर घर पायक सुरुवा मिलाउदै गएको निमित्त प्रमुख रेग्मीले बताउनुभयो । काम नहुने भएपछि अरु कर्मचारी अन्यत्रै सरुवा भएर गएको र नयाँ कर्मचारीहरु कोहिपनि नआएकोले सेवा सुचारु हुन नसकेको हो ।
अहिले यातायात कार्यालयको काम सुर्खेत र जुम्लाबाट मात्र भइरहेको छ । लगातार विभाग र मन्त्रालय धाउँदा कार्यादेश र वजेट सहमति पाईएको र तत्काल कर्मचारी व्यवस्थापनको लागि मन्त्रालयमा पत्राचार गरिएको निमित्त प्रमुख रेग्मीले जानकारी दिनुभयो ।
घर नजिकैको पायक पर्ने स्थानबाट सेवा पाउने आशा बोकेका स्थानीयवासी लामो समयसम्म कार्यालयले सेवा प्रवाह नगर्दा सुर्खेत, नेपालगन्ज र दाङ जानुपर्ने बाध्यता रहेको बताउँछन् । चौरजहारी १ का रिमप्रसाद शर्माले कहिले कार्यादेश नहुने, कहिले बजेट त कहिले कर्मचारी नहुँने समस्याले घर पायक सेवा पाउने आशा बोकेका सर्वसाधारण निराश भएको बताउनुभयो । घरनजिकै कार्यालय हुँदापनि कामका लागि जिल्लाबाहिर जाने बाध्यताको अन्त्य हुनुपर्ने उहाँको माग छ ।
जनशक्ति व्यवस्थापन भएमा सवारी साधनको कागजात र सवारी चालक अनुमतिपत्र नविकरण, नयाँ गाडि दर्ता तथा नविकरण, रुट परमिट लगायतका सेवा प्रवाह यस कार्यालयबाट हुने कार्यालयले जनाएको छ ।
