रुकुम पश्चिम / आसन्न मंसिर ४ गते हुने प्रदेश सभा निर्वाचनको लागि नेपाली काँग्रेस रुकुम पश्चिमले आकांक्षि उम्मेदवारहरुको नाम टुंग्याएको छ ।

शुक्रबार छु्ट्टाछुट्टै बसेको नेपाली काँग्रेस क्षेत्रिय कार्यसमितिको बैठकले प्रदेश निर्वाचन क्षेत्र 'क' र 'ख' को लागि उम्मेदवारहरु सिफारिस गर्ने निर्णय गरेको हो ।

बाँफिकोटको छिनखेतमा बसेको क्षेत्रिय कार्यसमितिको बैठकले प्रदेश निर्वाचन क्षेत्र 'क' को प्रत्यक्ष तर्फको निर्वाचनको उम्मेदवारको लागि कृष्णबहादुर रोकाय, हर्कसिं खत्री र टेकबहादुर बस्नेतको नाम सिफारिस गर्ने निर्णय गरेको छ । क्षेत्रिय उपसभापति रामबहादुर चन्दको अध्यक्षतामा बसेको बैठकले समानुपातिक तर्फ बालकुमारी गिरी र धिरेन्द्र कुमार बटालाको नाम सिफारिस गरेको छ ।

त्यसैगरी सानीभेरी गाउँपालिका ९ सिम्लीमा बसेको प्रदेश सभा 'ख' क्षेत्रिय कार्यसमितिको बैठकले प्रत्यक्ष तर्फ ६ जनाको नाम सिफारिस गर्ने निर्णय गरेको छ । जसमा प्रेमप्रकाश ओली, खड्कबहादुर डाँगी, शिव आचार्य, थलबहादुर खड्का, लालबहादुर ओली र देवबहादुर ओलीको नाम सिफारिसका लागि निर्णय भएको छ ।

क्षेत्रिय सभापति भद्रबहादुर बिष्टको अध्यक्षतामा बसेको बैठकले समानुपातिक तर्फ नौ जनाको नाम सिफारिस गर्ने निर्णय गरेको छ । तिलक भण्डारी, सीता ओली, आश्मादेवी गहतराज, मोहन आचार्य, प्रविर ददेल, लोकेन्द्र केसी, देवी पुन, दिपक बिएम र राजकुमार बादीको नाम समानुपातिक उम्मेदवारको लागि सिफारिस गरिएको छ ।

प्रदेश निर्वाचन क्षेत्र 'ख' मा विधानभन्दा बढी आकांक्षि उम्मेदवारहरुको नाम सिफारिस भएको बताईएको छ ।

क्षेत्रिय समितिले गरेको सिफारिस जिल्ला समितिमा पेश हुने र जिल्लाले प्रदेशमा पठाउने बताईएको छ । नेपाली काँग्रेस रुकुम पश्चिमले प्रतिनिधि सभा निर्वाचनको उम्मेदवारहरु चयन भने भदौ १८ गते शनिबार गर्ने बताईएको छ ।