सोसल मिडिया
सल्यान / लगातारको वर्षाका कारण विभिन्न स्थानमा पहिरो गएपछि राप्ती राजमार्ग अवरुद्ध भएको छ ।
राप्ती राजमार्गको रुकुम पश्चिममा पर्ने मुसीकोट - झुल्नेटा खण्ड, तुलसीपुर–अमेलिया सडक खण्ड र दाङ–सल्यान सडक खण्ड पहिरोले बन्द भएको छ ।
मंगलबार साँझबाट भइरहेको वर्षाका कारण रुकुम पश्चिमको त्रिवेणी गाउँपालिकाको डाँगिमोड लगायतका ठाउँमा पहिरो झरेपछि राजमार्गको मुसीकोट झुल्नेटा खण्ड अवरुद्ध भएको हो ।
त्यसैगरी पहिरो गएपछि राप्ती राजमार्गअन्तर्गत तुलसीपुर–अमेलिया सडक खण्ड पनि बन्द भएको छ । त्यस्तै दाङ–सल्यान सडक खण्ड पनि पहिरोले बन्द भएको छ । यस सडक खण्डको सल्यानको कपुरकोटमा पहिरो खसेपछि राप्ती राजमार्ग अन्तर्गत दाङ–सल्यान सडक खण्ड बन्द भएको जिल्ला प्रहरी कार्यालय सल्यानले जनाएको छ ।
सडक बन्द भएपछि दर्जनौँ गाडी बीच सडकमा रोकिएका छन् ।
