रुकुम पश्चिम / दशै तिहारको बेलामा सञ्चालनमा आउने अपेक्षा गरिएको रुकुम पश्चिमको चौरजहारी विमानस्थल यस पटक पनि सञ्चालनमा आएको छैन । विमानस्थल सञ्चालनमा नआउँदा यहाँका सर्वसाधारणहरुले सास्ती पाउने गरेका छन् ।

लामो समयदेखि बन्द अवस्थामा रहेको चौरजहारी नगरपालिका –१, स्थित यस विमानस्थललाई चाडवाडको बेलामा सञ्चालनमा आउने स्थानीयले अपेक्षा गरेका थिए ।

चौरजहारी नगरपालिका २, का मदन कुमार गौतमले आठ वर्षदेखि बन्द अवस्थामा रहेको विमानस्थल यस वर्ष दशैतिहारमा सञ्चालन गरिने आशा बोकेतापनि निराशामा परिणत भएको बताउनुभयो । तत्कालिन स्थानीय सरकारका जनप्रतिनिधीहरुसँगको टोलीसँग विमानस्थल सञ्चालनको लागि पर्यटन मन्त्रालय जाँदा दशैतिहारको बेलामा सञ्चालनमा ल्याउन सकिने आश्वास पाएको उहाँले जानकारी दिनुभयो । तर विमानस्थल सञ्चालनको कुनै प्रक्रिया सुरु नगरिएको उहाँको भनाई छ ।

स्थानीय खिमप्रसाद जैसीले विमानस्थल बेवारिसे जस्तै भएको बताउनुभयो । चाडपर्वको बेला सडक यातायातमा जोखिमपूर्ण यात्रा गर्दै आउने सर्वसाधारणहरु जहाजको सुविधा लिनबाट बञ्चित भएको उहाँले बताउनुभयो । ‘न गतिलो सडक बनेको छ, न भएको एर्पोटमा जहाज आउँछ,’ जैसीले भन्नुभयो, ‘राज्यको ठुलो सम्पति खेर गईरहेको छ, जनताले कष्ट भोगिरहेका छन् ।’ चाडवाडको बेला शहर तथा परदेशबाट घर फर्कनेहरुको भिडले गाडिको यात्रा चुनौतिपुर्ण रहेको छ ।

२०२८ सालदेखि सञ्चालनमा आएको यो विमानस्थल २०७० सालको फागुनबाट सञ्चालनमा छैन । रुकुम, सल्यान र जाजरकोट जिल्लालाई लक्षित गरी चौरजहारीमा विमानस्थल बनाइएको थियो ।

२०७० फागुनदेखि २०७२ भदौसम्म धावनमार्ग कालोपत्र गरिएको थियो । पाँच करोड ५९ लाख ४९ हजार ९५२ रुपिँयाको लागतमा विमानस्थलको धावनमार्ग कालोपत्र गरिएको थियो । विमानस्थलको स्तरोन्नति भएपछि यहाँ विमान आउन कम भए । पछिल्लो पटक यो विमानस्थल बन्द जस्तै छ । विमानस्थल र टावर कुनैमा कर्मचारी छैनन् ।