जाजरकोट / भेरि नदिमा डुबेर जाजरकोटमा एक युवाको ज्यान गएको छ भने एक युवा बेपत्ता भएका छन् ।

जाजरकोट सदरमुकाम नजिकै भेरी नदीको किनारमा पिकनिक खान गएका भेरी नगरपालिका ४ का २० वर्षिय रोशन खड्काको नदीमा डुबेर मृत्यु भएको प्रहरीले जनाएको छ । भेरी नगरपालिका ३ का २६ वर्षिय विक्रान्त केसी भेरी नदीमा बेपत्ता भएका छन् ।

उनीहरुसँगै भेरी नदिमा डुबेका एक जनालाई जीवितै उद्धार गरिएको छ । नदीमा डुबेका बिरेन्द्र शाहीलाई भने जीवितै उद्धार गरिएको छ । उनका साथीहरुले उद्धार गरेका हुन् । रोशन र विरेन्द्र डुबेपछि साथीहरुलाई बचाउन गएका बिक्रान्त बेपत्ता भएका छन् । बेपत्ताको खोजी कार्य भैरहेको प्रहरीले जनाएको छ ।

तिहारको अवसरमा जाजरकोटको सदरमुकाम खलंगामा हालै भएको फुटबल प्रतियोगितामा खसी बाजी जितेका युवाहरुले मंगलबार भेरी नगरपालिका ११ मटेला स्थित भेरी नदी किनारामा पिकनिक (भोज) को आयोजना गरेका थिए । पिकनिक गएका युवाहरु नदीमा नुहाउने क्रममा डुबेर मृत्यु भएको प्रहरीले जनाएको छ ।

नदीमा डुबेका र बेपत्ताको खाजी तथा उद्धारका लागि तत्काल नेपाल प्रहरी र शसस्त्र प्रहरीको टोली घटनास्थल पठाईएको प्रमुख जिल्ला अधिकारी अन्जन श्रेष्ठले बताउनुभयो ।