रुकुम पश्चिम / रुकुम पश्चिमको सानीभेरी गाउँपालिका ३ ज्यामिरे स्थित एक घरमा आगलागी भएको छ । शनिबार स्थानीय देव बहादुर पुनको घरमा आगलागी भएको हो ।

आगलागि भएको सूचना लगत्तै चुनावी अभियानमा रहेको वाम लोकतान्त्रिक गठबन्धनका उम्मेदवार राजकुमार शर्मा सहितको टोली घटनास्थल पुगेर आगो नियन्त्रणमा लिएको पीडित पुनले बताउनुभयो ।

शर्मा रुकुम पश्चिमको प्रदेश निर्वाचन क्षेत्र नं. २ को प्रत्यक्ष तर्फको उम्मेदवार हुनुहुन्छ । चुनावी अभियान अन्तर्गत मतदाता भेटघाटमा रहनुभएका शर्माले साथमा रहेका कार्यकर्ताहरुलाई आगो नियन्त्रणमा लिन निर्देशन दिनुका साथै आफैपनि परिचालन भएर आगो नियन्त्रणमा लिएको बताईएको छ ।

शर्माले चुनावी अभियान अन्तर्गत मतदाता भेटघाटको क्रममा रहेको बेला स्थानीयको घरमा आगो लागेको खबर आउन साथ चुनावी भेटघाट कार्यक्रमलाई तत्काल रोकेर कार्यकर्ता सहित घटनास्थल पुगेको बताउनुभयो । उहाँले सबै मिलेर घर भित्रको सामान जलेको भएतानि पुनको घर र अन्य सम्पत्ति क्षति हुनबाट जोगिएको जनाउनुभयो ।

पुनको दुईतले टिनले छाएको घर भित्र आगलागि भएको थियो । आगोको कारण पुनको घरभित्रको अन्नपात र लत्ताकपडा भने पहिले नै जलिसकेको बताईएको छ । पुनले घरमा भित्र रहेको करिब दुई लाख बराबरको सामान क्षति भएको बताउनुभयो । घटनास्थलमा प्रहरी पुगेर क्षतिको विवरण संकलन गरिरहेको बताईएको छ ।