सल्यान / बनगाड कुपिण्डे नगरपालिका ४ काफलपानी पहिरोको उच्च जोखिममा रहेको छ । असोजमा आएको एक हप्ता लामो वर्षातको कारणले उक्त क्षेत्र उच्च जोखिममा परेको हो । त्यस गाउँका २४ घर उच्च जोखिममा परेका छन ।

स्थानीयका अनुसार काफलपानीका घरहरू भएको ठाउँ पुरै केही फिट तल भासिएको छ । स्थानीयहरु जोखिम मोलेर नै त्यस ठाउँमा बस्न बाध्य भएका छन् ।

पीडित मेघराज गिरिका अनुसार उहाँको घर र मिल जोखिम परेको छ । उहाँको मिल ३ महिना देखि बन्द अवस्था रहेको छ । मिल बनाएर राखिएको जमिन केहि फिट तल बसेका कारण मिलका सम्पुर्ण मेसिनरी औजारहरु बिग्रिएका छन् ।

गाउँनै जोखिममा रहँदा पनि आफुहरुलाइ राज्यले कुनै पनि चासो नदिएको स्थानीयको गुनासो रहेको छ । पीडित शसिराम कामीले भने घर जोखिम बन्दै भएकोले सुत्दा पनि निद्रा नलाग्ने बताउनुभयो । परिवार कसरी बचाउने भन्ने पीरमा रहेको उहाँको उल्लेख गर्नुभयो । आफ्नो बस्ने ठाउँ अन्यत्र नभएकोले भगवान भरोसा भन्दै जोखिमपूर्ण घरमा बस्न बाध्य भएको कामीको भनाइ छ ।

बस्ती स्थानन्तरणका लागि पहल गर्छौं : नगर प्रमुख बुढाथोकी

बनगाड कुपिण्डे नगरपालिका नगर प्रमुख कर्ण बहादुर बुढाथोकीले उक्त बस्ती असाध्यै जोखिममा रहेकोले त्यसलाई स्थान्तरको लागि पहल गर्ने बताउनुभएको छ । त्यस ठाउको अनुगमन गर्न पुगेका नगर प्रमुख बुढाथोकीले विभिन्न निकाय सङ्ग समन्वय भैरहेको र जनताको आवश्यकता अनुसार पहल गर्ने बताउनु भयो ।

राज्यले लिएको ठाउँमा पीडितहरु जान सक्ने वा नसक्ने त्यो विषय भने केही सुझाव लिएर आफुले सक्दो पहल गर्ने उहाँले बताउनुभयो । सम्बन्धित निकाय सङ्ग समन्वय गरेर नगरपालिका भित्रका जोखिम बस्तिहरु स्थान्तरण गरिने नगर प्रमुख बुढाथोकीले बताउनु भयो ।