रुकुम पश्चिमको आठबिसकोट नगरपालिकाले घरदैलोमै पुगेर विभिन्न सेवाहरु प्रदान गरेको छ । घर आँगनमै सेवा दिने उद्धेश्यले सञ्चालित “एकिकृत सेवा प्रवाह घुम्ती शिविर” कार्यक्रम मार्फत नगरपालिकाले विभिन्न योजनाको सम्झौताहरु समेत गाउँमै गरेको जनाएको छ ।

निमित्त प्रमुख प्रशासकीय अधिकृत मणिराज शाहका अनुसार विभिन्न ५७ वडा योजनाहरु गाउँमै पुगेर सम्झौता गरिएको छ । यी सम्झौताहरु सात वटा वडाका मात्र हुन् । वडागत योजनाहरु, मुख्यमन्त्री तथा प्रधानमन्त्री रोजगार कार्यक्रम, नगरस्तरिय योजनाहरु सम्झौता गाउँमै गरिएको हो । नगरपालिकाको केन्द्रको नजिक रहेकाहरुलाई भने सम्झौताका लागि कार्यालयमै बोलाईने गरिएको छ ।

निमित्त प्रमुख प्रशासकीय अधिकृत शाहले वडा नम्बर १, २, ४, ५, ६, १३ र १४ वडामा पुगेर विभिन्न योजनाहरुको सम्झौता गरिएको बताउनुभयो । गत मङसिर ११ गतेबाट सुरु गरिएको एकिकृत घुम्ती शिविर करिब एक महिनासम्म सबै वडामा संचालन भएको हो । शिविरमा सिफारिस, विभिन्न कामहरुको सहजिकरण, सम्झौता, अपाङ्गगता परिचयपत्र वितरण लगायतका सेवाहरु रहेका थिए ।

नगरपालिकाका अनुसार घुम्ती शिविरमा वडा नम्बर १४ मा १० वटा, वडा नम्बर १३ मा सात वटा, वडा नम्बर ६ मा १० वटा, वडा नम्वर ५ मा तीन वटा, वडा नम्बर ४ मा तीन वटा, वडा नम्बर २ मा चार वटा, वडा नम्वर १ मा पाँच र अन्य वडामा १५ गरि जम्मा ५७ वटा विभिन्न योजना सम्झौता गरिएको छ ।

नगरपालिकाका योजना शाखा प्रमुख रत्नबहादुर परियारले घुम्ती शिविरबाटै १९ जनालाई अपाङ्गगता परिचयपत्र दिएको जनाउनुभयो । उहाँका अनुसार वडा नम्बर १४ मा ६ जना , वडा नम्बर १३ मा सात, वडा नम्बर २ मा एक जना र वडा नम्वर १ मा पाँच गरेर १९ जना अपांगता भएका व्यक्तिहरुलाई परिचयपत्र वितरण गरिएको छ ।

आठबिसकोट नगरपालिकाका प्रमुख रबि केसीले नगरपालिकाबाट प्रवाह गरिने सेवाहरुको विकेन्द्रीकरण गरेर सेवा प्रवाह गर्ने, सरल र सहज रुपमा सेवा उपलब्ध गराउने, सार्वजनिक सेवा प्रवाहलाई सेवाग्राही मैत्री बनाउने उद्धेश्यका साथ नगरपालिकाले एकिकृत सेवा प्रवाह घुम्ती शिविर संचालन गरेको बताउनुभयो ।

जनताको नजिकको सरकार मानिएको नगरपालिकाले जनताको आँगनमै सेवा पुगेर सेवा दिएपछि स्थानीयवासी खुशि भएका छन् ।