रुकुम पश्चिमका बाल विकास कक्षाका शिक्षकहरुले पाठ्क्रमको अभावमा बाल शिक्षा सञ्चालनमा समस्या भैरहेको जनाएका छन् । शनिबार जिल्लाको त्रिवेणी गाउँपालिकामा एक कार्यक्रम आयोजना गरेर उनीहरुले सरकारले बाल शिक्षालाई बेवास्ता गरेको आरोप लगाएका छन् ।

कार्यक्रममा बाल शिक्षक सञ्जाल रुकुम पश्चिमका अध्यक्ष निर्मला ओलीले कक्षा १ देखि १२ सम्ममा पाठ्यक्रम व्यवस्था गरेको तर केहि स्थानीय तहमा विकास कक्षाको पाठ्क्रम व्यवस्था नगरेको बताउनुभयो । बालबालिकाको सर्वाङ्गिण विकासको पहिलो खुड्किलोमै विभेद भएको भन्दै बाल शिक्षाको विकास राज्यको प्राथमिकतामा नपरेको उहाँले जनाउनुभयो ।

बाल विकास कक्षाको लागि सिकाई सहजिकरण पुस्तिका, निर्देशिका, दैनिक क्रियाकलाप पुस्तिकाको व्यवस्था नहुँदा कक्षालाई थप प्रभावकारी बनाउन समस्या भैरहेको अध्यक्ष ओलीले उल्लेख गर्नुभयो ।

कार्यक्रममा सहभागी बाल विकास कक्षाका शिक्षकहरुले बाल शिक्षा र शिक्षकहरुको सेवा सुविधाको सवालमा राज्यले चासो नदिएको गुनासो गरेका छन् । उनीहरुले बाल शिक्षकहरुको तलब र सुविधा बृद्धिको माग गरेका छन् ।

स्थानीय सरकार तथा सरोकारवालाहरुसँगको अन्तरक्रियामा तलब सुविधा बृद्धिको माग गरेको बाल विकास कक्षा शिक्षक कमला चन्दले जानकारी दिनुभयो । हाल संघीय सरकारबाट १० हजार र स्थानीय सरकारबाट सात हजार गरेर १७ हजार रुपियाँ मासिक तलब पाउने गरेको उहाँले बताउनुभयो ।

बढ्दो महंगी र बाल शिक्षकहरुको मेहेनत, आवश्यकताका आधारमा तलब बृद्धि हुनुपर्ने माग बाल कक्षा शिक्षकहरुको रहेको छ । प्राथमिक विद्यालयका शिक्षकहरुको सेवा र सुविधा सरह बाल कक्षा शिक्षकहरुको तलब तथा सुविधा हुनुपर्ने उनीहरुको माग रहेको छ ।

कार्यक्रममा बाल कक्षा शिक्षकहरुका माग र समस्याका बारेमा स्थानीय सरकार र सरोकारवालाहरुको ध्यानाकर्षण गराईएको सञ्जालले जनाएको छ । यसका साथै बाल कक्षा शिक्षकहरुको कामको मूल्याङकन सहि हुनुपर्ने, तालिमको व्यवस्था हुनुपर्ने र तीनै तहका सरकारको बुझाई साझा हुनुपर्ने माग राखिएको सञ्जालका जिल्ला अध्यक्ष ओलीले जानकारी दिनुभयो ।

कार्यक्रममा त्रिवेणी गाउँपालिका अध्यक्ष गणेशकुमार केसीले बाल कक्षा शिक्षकहरुका मागहरु सकारात्मक रहेको बताउनुभयो । उहाँले बाल शिक्षकहरुलाई स्थानीय सरकारको तर्फबाट सक्दो सहयोग गरिरहेकोले आगामी दिनहरुमा पनि तालिमको र पाठ्यक्रमको व्यवस्था गरिने अध्यक्ष केसीले बताउनुभयो । त्रिवेणी गाउँपालिकामा मात्र ४५ वटा विद्यालयमा बाल शिक्षाको कक्षा सञ्चालन भईरहेका छन् ।

कार्यक्रममा गाउँपालिकाका प्रमुख प्रशासकीय अधिकृत प्रेम बहादुर घर्ति, सामाजिक विकास समितिका संयोजक रण बहादुर पुन, गाउँपालिकाका प्रवक्ता सुन्दर ओली, विभिन्न विद्यालयका प्रधानाध्यापकहरु तथा शिक्षकहरुको समेत उपस्थिति रहेको थियो ।