रुकुम पश्चिमको सानीभेरी गाउँपालिकामा कृषि मेला प्रदर्शनी सम्पन्न भएको छ । शुक्रबार र शनिबार सानीभेरी गाउँपालिकाको वडा नम्वर ९ सिम्लीको राप्ती ज्ञानोदय माविको प्रांगणमा कृषि मेला प्रदर्शनी सम्पन्न भएको हो ।

कृषि विकास कार्यालय र सानीभेरी गाउँपालिकाको संयुक्त आयोजनामा भएको गाउँपालिका स्तरिय कृषि मेला प्रदर्शनीमा विभिन्न ६ वटा विधा अन्तर्गतका ५० वटा कृषि बाली उत्पादनहरु प्रदर्शनीमा राखिएको कृषि विकास कार्यालयका निमित्त प्रमुख मिनबहादुर केसीले बताउनुभयो । उहाँका अनुसार प्रदर्शनीमा खाद्यान्न बाली, दलहन बाली, तरकारी बाली, फलफूल बाली, मसला तथा नगदे बाली र विविध बाली अन्तरगत विभिन्न प्रकारका कृषि वस्तुहरु राखिएको थियो ।

प्रदर्शनीमा ३०४ जना कृषकहरुले प्रतिस्पर्धामा भाग लिएको कृषि विकास शाखा सानीभेरी गाउँपालिकाका प्रमुख महेन्द्र ओलीले जानकारी दिनुभयो । जसमध्ये ६ वटा विधा अन्तर्गतका ३० जना कृषकहरु पुरस्कृत हुनुभएको छ । प्रथम, दोश्रो, तेस्रो र सान्त्वना स्थान प्राप्त गर्न सफल कृषकहरुलाई आयोजकले क्रमश ५ हजार, ४ हजार ३ हजार र २ हजार नगद रकम तथा प्रमाणपत्र प्रदान गरिएको थियो ।

त्यस्तै सहभागी किसानहरुलाई सानिभेरी गाउँ गाउँपालिकाले जनहि ५ सयका दरले प्रोत्साहन रकम व्यवस्था गरेको शाखा प्रमुख ओलीले जानकारी दिनुभयो ।

कृषि मेला प्रदर्शनीमा किसानका सन्देशमुलक गीत नृत्य तथा विभिन्न वडाका झाँकीहरु प्रस्तुत गरिएको थियो । कृषि विकास कार्यालयका अनुसार हालसम्म अन्यत्र पालिकाहरु भन्दा सानीभेरी गाउँपालिकामा किसानहरुको उत्साहपूर्ण सहभागिता रहेको बताएको छ ।