सल्यान / सल्यानको शारदा नगरपालिकाले अनाधिकृत संरचना भत्काउन सुरु गरेको छ । नगरपालिकाको वडा नम्बर १ श्रीनगरस्थित अस्थायी बसपार्क वरपरको ऐलानी जग्गा अतिक्रमण गरी निर्माण गरिएका घरटहराहरू नगरपालिकाले आइतबारदेखि भत्काउन सुरु गरेको छ ।

आधुनिक बसपार्क निर्माणका लागि ती संरचना हटाउन ३५ दिने सूचना प्रकाशन गरे पनि सबै स्थानीयले घरटहरा नहटाएपछि नगरपालिकाले डोजर लगाई भत्काउन सुरु गरेको नगर प्रमुख प्रकाश भण्डारीले जानकारी दिनुभयो ।

अस्थायी बसपार्क वरिपरि ३५ रोपनी ऐलानी जग्गा अतिक्रमण गरी स्थानीय तथा आसपासका व्यक्तिहरू ८५ घरटहरा निर्माण गरी झन्डै तीन दशकदेखि बसोबास र ब्यापार व्यावसाय गर्दै आएका छन् । तिनै घरटहरा हटाउन शारदा नगरपालिकाले एक स्काभेटर र दुई डोजर प्रयोग गरेको हो ।

नगर प्रमुख भण्डारीका अनुसार आइतबार मात्रै दुई दर्जनभन्दा बढी घरटहरा भत्काइएको र बाँकी घरटहरा पनि डोजर लगाई भत्काउने काम भरहेको छ । कतिपय स्थानीयले भने आफैंले घरटहरा भत्काएर घरका सामग्री लिएर अन्यत्र गएका छन्।