सोसल मिडिया
रुकुम पूर्वका शिक्षकहरुको लागि आयुर्वेद तथा योग शिक्षा सम्बन्धि अभिमुखिकरण कार्यक्रम सञ्चालन गरिएको छ । जिल्ला आयुर्वेद स्वास्थ्य केन्द्र रुकुम पूर्वले जिल्लाका तीन वटै गाउँपालिकाका शिक्षकहरुको लागि दुई दिने अभिमुखिकरण कार्यक्रमको आयोजना गरेको हो । सोमबार र मंगलबार चल्ने अभिमुखीकरण कार्यक्रममा तीन वटै गाउँपालिकाका १५ जना शिक्षकहरुको उपस्थिती रहेको छ ।
अभिमुखीकरण कार्यक्रममा सहभागी शिक्षकहरुलाई योगको महत्व, यसका फाइदा, योग गर्दा ध्यान दिनुपर्ने कुराहरुसँगै आयुर्वेद उपचार पद्धतीको बारेमा जानकारी गराइएको छ । योगको बारेमा जानकारी सँगसँगै योग अभ्यास पनि गराइएको छ । बिहान ७ बजेबाट १० बजेसम्म यो कार्यक्रम आयुर्वेद स्वास्थ्य केन्द्रको अफिस रहेको घरको छतमै सञ्चालन भइरहेको छ । पहिलो दिन आज कार्यक्रममा भास्त्रिका प्रणायाम, सुक्ष्म व्यायाम, कपालभाती, नाडी सोधन प्रणायाम, अनुलोम विलिन प्रणायाम, भ्रामरी प्रणायाम, सुर्य नमस्कार, अष्टाङ्ग योग लगाएतको बारेमा जानकारी सँगसँगै अभ्यास गराइएको छ ।
आजको अभिमुखीकरण कार्यक्रमलाई उद्ध्घाटन गर्दै जिल्ला समन्वय समितिका प्रमुख मेघबहादुर श्रेष्ठले योग र आयुर्वेद उपचार पद्धतीले मानिसलाई स्वस्थ राख्ने बताउनुभएको छ । हाम्रै माझमा थुप्रै खालका जडीबुडी भएपनि त्यसलाई चिन्न र प्रयोग गर्न नसक्नु भने दुखद कुरा रहेको उहाँले बताउनुभयो । सीप तथा ज्ञान पछिल्लो पुस्तामा हस्तान्त्रण हुन नसक्दा पनि परम्परागत चिकित्सा पद्धती हराउदै गएकोमा दुख व्यक्त गर्नुभयो । रुकुम पूर्व जडिबुटीको धनी जिल्ला भएपनि यहाँको जडिबुटीलाई संकलन, प्रशोधन र प्रयोग गर्न नसकिएको बताउदै उहाँले त्यसतर्फ पनि ध्यान दिनुपर्ने भनाई राख्नुभयो । पछिल्लो समयमा आयुर्वेद योगलाई राज्यले केहि विस्तार गर्न खोजेको भन्दै यो कुरा सकारात्मक रहेको र यसले मानव स्वास्थ्यलाई धेरै फाइदा गर्ने बताउनुभयो ।
शिक्षकहरुसँग अभिमुखीकरण कार्यक्रम गर्दा अझ थप प्रभावकारी हुने अपेक्षा राखेको आयुर्वेद स्वास्थ्य केन्द्रका प्रमुख विष्णुहरी आचार्यले बताउनुभयो । विभिन्न चरणमा विद्यालयमा र समुदायस्तरका मानिसहरुलाई बोलाएर अभिमुखीकरण कार्यक्रम र योग अभ्यास गराउदै आएको पनि उहाँले बताउनुभयो । विस्तारै यस जिल्लाका मानिसहरु पनि आयुर्वेद स्वास्थ्य उपचारतर्फ आकर्षित हुँदै गएको उहाँको भनाई छ ।
गएको आर्थिक वर्षमा रुकुम पूर्वमा कार्यालय स्थापना गरिएको थियो । कार्यालय स्थापना भएयता कार्यालयबाट आठ सय भन्दा धेरै नागरिकले आयुर्वेद सेवा लिएका छन् । यस्ता अभिमुखीकरण कार्यक्रमले मानिसलाई ऋतुअनुसारको जीवनयापन गर्न मदत पुग्ने र यसले स्वास्थ्यलाई फाइदा हुने प्रमुख आचार्यले बताउनुभयो ।
