विकासविरोधी काम हुन नदिन जनता नै अन्तिम अस्त्रः सचिव लामिछाने

एकताको एकवर्षमा जिल्ला तहमा नेतृत्वको भागबण्डा टुंगाएको नेपाल कम्युनिष्ट पार्टी नेकपामा अहिले स्थानीय तहमा धमाधम नेतृत्व निर्माण र शपथ ग्रहणको काम भैरहेको छ । केही समयअघि मात्र कान्छो जिल्ला नवलपुरको गैंडाकोट नगरपालिकामा नेतृत्वको टुंगो लगाएर सपथ ग्रहण गराउने काम सम्पन्न भयो । नेकपाले तल्लो तहमा एकतालाइ टुंगो लगाउँदै गर्दा स्थानीय तहमा पार्टी कसरी अघि बढ्छ भन्ने चासो सर्वत्र छ । यसैबिषयमा हामिले भर्खरै सपथ ग्रहण सकाएर काम थालेको नेकपा नगरकमिटी गैंडाकोटका सचिव श्यामसुन्दर लामिछानेसंग कुरा गरेका छौं ।

श्यामसुन्दर जी स्वागत छ यहाँलाई ।

धन्यवाद ।

सर्वप्रथम बधाई र शुभकामना ।

यो शुभेच्छाका लागि विशेष आभार ।

शपथ ग्रहण भैसक्यो । हिजोआज कमिटिले के गरिरहेको छ ?

शपथ ग्रहण पश्चात नगरकमिटिले कार्यालय समुह र सचिवालय बनायो । १८ वडा कमिटि रहेको गैंडाकोट नगरपालिकामा सबै वडामा वडाकमिटिको शपथ ग्रहण कार्यक्रम भर्खरै सकिएको छ ।

गैंडाकोट नगर क्षेत्र पार्टीगत रुपमा हेर्ने हो भने नेकपाका लागि त्यती सहज ठाउँ होईन । आगामी निर्वाचनका लागि पनि जनस्तरमा स्थान बनाउनुपर्ने होला ?

असहजताबाट सहजता खोज्ने हो । स्थानीय निर्वाचनले राम्रै आधार प्रदान गरेको छ । विकास निर्माणले तिव्रता पाएको छ । नगरपालिकामा हाम्रो नेतृत्व छ । प्रतिपक्षी दलको बाधा व्यवधान त छ तर हामी त्यसलाई चिर्दै छौं । आगामी निर्वाचनका लागि हामी दत्तचित्त भएर लागेका छौं । नगरपालिकामा अब आउँदो स्थानीय सरकारको निर्वाचनमा हामी बहुमतका साथ हुने छौं र यसपटक गर्न नपाएका समृद्धिका कार्यभारहरु सम्पन्न गर्नेछौं हाम्रो वडाकमिटि बनिसके । टोल सेलकमिटि तथा जनवर्गिय संगठनहरुको जालो जनस्तरसम्म पुग्ने छ । हामी जनजनमा भिज्नेछौं र अबका चुनावमा हाम्रो जीत निश्चित छ ।

कसरी जनताको मन जित्ने गरी काम गर्नुहुन्छ ?

जनता जनार्दन हुन् । जनताले बुझेका छन् हाम्रो पार्टीबाट निर्वाचित जनप्रतिनिधिहरु विकास र समृद्धिका लागि अहोरात्र खटिइरहनुभएको छ । विकासलाई कस्ले अगाडी बढाउन खोजेको छ र कस्ले व्यवधान ल्याएर रोक्न खोजेको छ । हाम्रो स्थानीय तहमा जनजनमा यो चर्चा छ । विपक्षीको धारणा नै नकारात्मक छ । विकास नहोस् र नेकपाले जस नपाओस् भन्ने । विकास र समृद्धिले स्थान पाउँदा वित्तिकै हाम्रो उचाई बढ्ने छ, त्यो विपक्षीले राम्ररी बुझेको छ ।

अहिले त तपाईहरुलाई चुनौती पनि छ नगरमा नेतृत्व आफ्नो भएपनि बहुमत प्रतिपक्षीको छ । यसले तपाईहरुलाई भनेजस्तो सजिलो त पक्कै नहोला ?

नगरप्रमुख हाम्रो पार्टीबाट हुनुहुन्छ तर कार्यपालिकामा हाम्रो बहुमत छैन् । स्थानीय सरकारमा पक्ष र विपक्षको व्यवस्था नेपालको संबिधानले गरेको छैन् तर गैंडाकोटको हकमा नेपाली काँग्रेसमा बहुमतको दम्भ छ । विकास र समृद्धि रोक्ने गरि नै कार्यहरु हुँदै आएका छन् । विकास रोकियो भने हामी जनतामा जानेछौं जसले उनीहरुलाई हानि हुनेछ । यस्तै प्रतिकुलताको बिचबाट नै हामी अगाडी बढ्ने छौं । विकासका कुन कुन कामहरु हामीले गर्न पाएनौं सो को कारणसहित जनता जनार्दनसमक्ष पुग्नेछौं । जनता नै हाम्रा अन्तिम अस्त्र हुन् । 

तपाईँहरुको काम प्रतिपक्षको विरुद्ध मात्रै कि जनताको पक्षमा ?

हाम्रो काम जनताको पक्षमा हो । तर प्रतिपक्षले बाधा व्यवधान ल्याएको अवस्थामा त्यसको सिर्जनात्मक र तार्किक बिरोध त गर्नुपर्‍यो नि ।

जनताको पक्षमा हो भने त मतका लागि आधार बनाउन चुनौती छ नी हैन र ?

गैंडाकोटबासीको विकास र समृद्धिको चाहनाप्रति हाम्रो पार्टी प्रतिबद्ध छ । हाम्रो पार्टी जनताकै पार्टी हो । राष्ट्रिय निर्वाचनको बेलादेखि नै जनताले हामीलाई माया गरेका छन् । विकासविरोधीहरुलाई जनताको अगाडी चिनाउँदै हामी जनमत बनाउँदै छौं । चुनौती नभए त मौका कहाँ हुन्छ र ? चुनौतीलाई जनमतले चिर्नेछ र गैंडाकोटमा आगामी स्थानीय सरकार नेकपाको हुनेछ ।

गैंडाकोटले हालसम्म जती नेता पाएपनि उपेक्षा गरियो भन्ने सधैं सुनिन्छ । अघिल्ला निर्वाचित नेता उनीहरुको काम बजेट र विनियोजन अनि अहिलेको आवश्यकता मुल्यांकन गरेको छ त नेकपाले ?

नेकपाको नेतृत्वमा गैंडाकोट नगरपालिकाले दुई बर्षमा विगतमा काँग्रेसको नेतृत्वमा भएका काम भन्दा धेरै राम्रा कामलाई अगाडी बढाएको छ । कम्तिमा पहिलाको नेतृत्वले आश्वासनमात्र बाँडेर बर्षौसम्म झुलाएर राखेका हाम्रा नगरविकासका कामलाई हामी हाम्रै नेतृत्वमा वचनबद्ध भएर काम सुरु गरेको स्थितिमा छौं । 

पुर्वाधार विकास, विद्युतीकरण, खानेपानी जस्ता जनतासंग प्रत्यक्ष जोडिएका कामहरुमा यसअघि भोटको राजनिति गरियो हामीले तत्काल काम थालेर कम्तिमा स्थानीय सरकारको महशुस गराउन सकेका छौं । विकास र समृद्धिको कामलाई अगाडी बढाएका छौं । विकासका कामले एउटा लय समातेको स्थिति छ । नगरपालिकाबाट वडाका लागि विनियोजित बजेटले वडाबासीका अपेक्षा अनुसारका योजना पुरा हुँदैछन् । गण्डकी प्रदेश सरकारबाट पनि कृषि, विकास जस्ता कामका लागि प्राथमिकताका साथ बजेट विनियोजन भएको स्थिति छ । प्रदेश सरकारको प्राथमिकतामा गैंडाकोटको योजना पार्न सफल भएका छौं ।

पहिले तपाईहरु छुट्टाछुट्टै पार्टी हुँदा एकअर्कामै अल्मलिनुभयो अहिले एउटै पार्टी हुँदा आन्तरीक एकतामै रुमल्लीनुभएको छ । माथि भनेका कुरा गफ जस्तै भएनन् र ?

गैंडाकोटको सन्दर्भमा जब बाम गठबन्धन बनाएर २०७४ सालको प्रादेशिक र संघको चुनाव लड्यौं त्यहीबेलाबाट हामी घुलित भइसकेका छौं । पूर्व एमाले र पूर्व माओवादीका कार्यकर्ता घुलित छौं । स्थानीय सन्दर्भमा यो एउटा ठुलो उर्जा हो । नगरकमिटि, वडाकमिटि पनि सहज रुपमा बनायौं । दिनको शुरुवात बिहानीले गर्छ भनेजस्तै नेकपा गैंडाकोट नगरपालिकामा शशक्त र दरिलो रुपमा स्थापित भएको छ ।

उसोभए नेकपाका लागि गैंडाकोटमा अहिलेका प्रमुख प्राथमिकताहरु के के हुन् ?

गैंडाकोटका मुख्य प्राथमिकता भनेकै विकास निर्माण, विद्युतिकरण, पर्यटन, रोजगारी, धार्मिक सांस्कृतिक क्षेत्रको संरक्षण र प्रचार प्रसार, खानेपानी, सिंचाइ र कृषि हुन् ।

नेतृत्व तपाईहरुकै भएको हिसाबले यी काममा के के प्रगती भयो त ?

नगरपालिकाको नेतृत्व हामीमा आइसकेपछि सडक निर्माण र विस्तार कार्यले तिव्रता पाएको छ । विद्युतिकरणले गति लिएको छ । सिंचाइ र खानेपानी जस्ता क्षेत्रमा बजेट विनियोजन भएर काम सुरु भएको छ । नारायणी तटबन्धको काम अघि बढेको छ । कृषि र पशुपालन क्षेत्रमा कृषकलाई नगरपालिकाले प्रोत्साहन निति लिएर काम गरेको छ । विशेषत नगरपालिकाको मुख्य आवश्यकतालाई मध्यनजर गर्दै प्रदेश सरकारको बढी भन्दा बढी बजेट ल्याएर योजनालाई अघि बढाउने काम भएको छ । अरु थुप्रै काम हामिले गर्दैछौं कुनै सुरुवाती चरणमा छन् । कुनै प्रकृयामा छन् ।

अनि अब त यही नेतृत्वले काम गर्न ३ बर्ष नै त हो । यो बिचमा जनता सामु गरेका सबै वाचा कसरी पुरा गर्नुहुन्छ ?

नगरमा हाम्रो नेतृत्वले काम गर्न ३ वर्ष बाँकी छ । ३ वर्षमा विकास र समृद्धिका धेरै काम हुन सक्छन् । जनतासमक्ष गरेका वाचाहरुको प्रगती अहिले पनि राम्रै देखिन्छ । केही नटुङ्गीएका काम हाम्रै नेतृत्वमा सफल हुनेछन् । हामी पार्टी एकताको उर्जा र अहिलेसम्म अरु राजनैतिक दलले भोट तानेर विकासका काममा सपना मात्रै बाँडेको स्थितिलाई चिर्न जनतासंगै काम गरिरहेका छौं । यसले नै हाम्रा चुनावी प्रतिबद्धताको जीवन्त प्रयोगसिद्ध गरेको छ ।

अन्त्यमा केही भन्नु छ ?

गैंडाकोटलाई साँच्चै देशकै नमुना स्थानीय तह बनाउनु छ । नेकपाको पहिलो प्रयास अहिलेसम्म जति पनि तहस नहस पारियो यहाँबाट जनतालाई ललिपप देखाउने र केन्द्रमा पुगेपछि अथवा स्थानिय तहमै पनि विगतमा जुन हिसाबले गैंडाकोटलाई जानाजान पछाडी पार्ने काम भयो त्यसलाई चिरेर नयाँ मार्गमा डोहोर्‍याउने हो । जुन अहिले गरिरहेका छौं । बाँकी कुरा यहाँका नागरीक नगरवासी र सरोकारवाला सबै राजनैतिक दल संघ संस्था संग मिलेरै काम गर्ने हो । विकासमा अबरोध गर्नेलाई त्यही अनुसार तह लगाउन विकासप्रेमि जनता र राजनैतिक दलसंग सधैं सहकार्य हुनेछ । आगामी दिनमा गैंडाकोटमा नेकपाको नेतृत्व जनता आफैं सुम्पने वातावरण बन्नेछ । नेकपाको विकास यात्रा अविरल छ ।

धन्यवाद

धन्यवाद मुलपाटी टिम र सम्पुर्ण पाठकलाई ।