रुकुम पश्चिम / रुकुम पश्चिमको मालपोत कार्यालयका जग्गाको कित्ताकाँट खुला भएको छ । कित्ताकाँट बन्द भएको करिब नौ महिनापछि जिल्लााका चार स्थानीय तहमा मात्र कित्ताकाँट खुला गरिएको हो ।

गत जेठ अन्तिम साताबाट बन्द गरिएको जग्गाको कित्ताकाँट फागुन १५ गते सोमबार देखि खुला भएको हो । जिल्लाको मुसीकोट नगरपालिका, चौरजहारी नगरपालिका, आठबिसकोट नगरपालिका र त्रिवेणी गाउँपालिका क्षेत्रमा हुने जग्गाको कित्ताकाँट खुला भएको हो ।

मालपोत कार्यालयका निमित्त प्रमुख ओमबहादुर खत्रीका अनुसार चार स्थानीय तहले स्थानीय भूउपयोग कार्यविधि तयार गरेकोले कित्ताकाँट फुकुवा गरिएको हो । अव जिल्लाका सानीभेरी र बाँफिकोट गाउँपालिकाले उक्त कार्यविधि तयार गर्न बाँकि रहेको बताईएको छ ।

गत जेठ महिनाको अन्तिम साता भूमि व्यवस्था, सहकारी तथा गरिबी निवारण मन्त्रालयबाट प्राप्त निर्देशन अनुसार कित्ताकाँट बन्द गरिएको थियो । स्थानीय भूउपयोग कार्यविधि तयार नगरेसम्म कित्ताकाँट बन्द गर्ने मन्त्राललयको परिपत्र आएकोले नौ महिना उक्त सेवा बन्द गर्नुपरेको निमित्त प्रमुख खत्रीले बताउनुभयो । कार्यविधि बनाउन बाँकि रहेका दुई गाउँपालिकाले चाँडै नै कार्यविधि बनाईसक्न लागेको सूचना प्राप्त भएको मालपोत कार्यालयले जनाएको छ ।

अब भूउपयोग नियमावली, २०७९ को दफा १२ अनुसार जिल्लामा कृषि र आवासीय क्षेत्रको कित्ताकाँट गरिने जनाईएको छ । जसअनुसार कृषि क्षेत्रको लागि कम्तिमा एक हजार वर्गमिटर र आवासीय क्षेत्रको जग्गाको लागि कम्तिमा १३० वर्गमिटर जग्गा हुनुपर्नेछ । तोकिएको क्षेत्रफलभन्दा कम जग्गाको कित्ताकाँट नहुने नियमावलीले व्यवस्था गरेको छ ।

स्थानीय भूउपयोग कार्यविधि तयार गर्नुअघि स्थानीय तहले स्थानीय भूउपयोग परिषद गठन, क्षेत्र वर्गिकरण लगायतका काम सम्पन्न गर्नुपर्ने हुन्छ । जिल्लाका चार स्थानीय तहले फागुन १५ भित्र कार्यविधि तयार गरेर कार्यपालिका बैठकबाट अनुमोदन समेत गरेका छन् । उक्त निर्णय मालपोत कार्यालयमा प्राप्त भएपछि कित्ताकाँट खुला भएको हो ।

कित्ताकाँट फुकुवा भएकै दिनदेखि मालपोतमा सेवाग्राहिको भिड बढ्न थालेको छ । कार्यालयका निमित्त प्रमुख खत्रीले जनशक्ति थोरै भएकोले सेवााग्राहिको चाप थेक्न गाह्रो हुने उल्लेख गर्नुभयो ।

दरबन्दी कम र बेलाबेलामा हुने सिस्टमको समस्याका कारण सेवाग्राहि आएकै दिनमा सेवा दिन सकिदैन कि भन्ने चिन्ता रहेको उहाँले उल्लेख गर्नुभयो । कार्यालयमा एक जना अधिकृत, तीन नायब सुब्बा, दुई खरिदार, एक टाइपिस्ट र चार जना कार्यालय सहयोगीको दरबन्दि रहेको छ । अधिकृत दरबन्दी खाली हुँदा नायब सुब्बाले निमित्त प्रमुखको जिम्मेवारी सम्हाल्नुभएको छ ।