सोसल मिडिया
रुकुम पश्चिममा रहेको चौरजहारी उद्योग वाणिज्य संघको निर्माणाधिन कार्यालय भवन लामो समयदेखि अलपत्र अवस्थामा रहेको छ । चौरजहारीको बसपार्क नजिक बन्न थालेको उक्त भवन बजेट अभाव भएको भन्दै बन्दाबन्दै रोकिएको हो ।
तीन वर्ष देखि पिलर र थोरै वाल उठाएको अवस्थामा उक्त भवन रहेको छ । अहिले निर्माणाधिन भवन अलपत्र जस्तै भएको छ । उद्योग वाणिज्य संघको कार्यसमिति भित्र विवाद रहेको र आर्थिक पारदर्शिता नभएको भन्दै कार्यसमिति भित्रै विवाद भएकोले भवनको काम पूर्ण हुन नसकेको बताईएको छ ।
उद्योग वाणिज्य संघ चौरजहारीका अध्यक्ष प्रेम सुनारले आर्थिक अभावले भवन पुरा गर्न नसकिएको बताउनुभयो । सबै व्यापारीहरुबाट चन्दा उठाएर भएपनि कार्यालय भवन बनाउने गरी भएको सल्लाह अनुसार भवन निर्माण सुरु गरिएको तर कोरोना महामारी, टिमवर्कको अभाव र व्यवसाय नविकरणको काम हुन नसक्दा भवन निर्माण अधुरै रहेको उहाँको भनाई रहेको छ ।
कार्यसमितिमा संस्थामा अपारदर्शिता रहेको भनेर विवाद हुन थालेपछि सहयोगी निकायले समेत सहयोग गर्ने वातावरण नबनेको उहाँले दुखेसो पोख्नुभयो । हालसम्म करिब २३ लाख रकम भवन निर्माणको काममा खर्च भएको जानकारी दिनुहुँदै अध्यक्ष सुनारले आफूले करिब आठ लाख रकम लगानी गरेको दाबी गर्नुभयो । सुरुमा स्थानीय सरकारले सहयोग गर्ने आश्वास दिएतापनि अहिले सहयोग नगरेको उहाँले उल्लेख गर्नुभयो ।
उद्योग वाणिव्य संघको अलपत्र भवन निर्माणका लागि चौरजहारी नयाँ शहर आयोजना कार्यालयले चासो देखाएको थियो । आयोजना कार्यालयले भवन पुर्ण बनाईदिने प्रस्ताव उद्योग वाणिज्य संघ समक्ष राखेपनि सफल हुन नसकेको जनाइएको छ ।
उद्योग वाणिज्य संघको विकासका लागि केहि गरौं भन्ने विभिन्न व्यक्ति तथा निकायबाट चासो भएको तर तर संघको आन्तरिक विवादको कारण उक्त काम अघि बढ्न नसकेको संघकै पदाधिकारीको भनाई रहेको छ ।
उद्योग वाणिज्य संघ चौरजहारीका केहि पदाधिकारीहरुले अध्यक्षको असक्षमताको कारण उद्योग वाणिज्य संघमा समस्या आएको आरोप लगाएका छन् । उनीहरुले आर्थिक पारदर्शिता नहुँनुका साथै लामो समयदेखि बैठक बस्न नसकेको, कार्यकाल पनि अधिवेशन हुन नसकेको, सस्था नविरकण समेत नभएको जानकारी दिएका छन् ।
