सोसल मिडिया
रुकुम पश्चिम / साढे तीन वर्ष पहिला रुकुम पश्चिमको चौरजहारी नगरपालिकामा खोलेको यातायात व्यवस्था सेवा कार्यालयले आईतबार देखि सेवाको शुभारम्भ गरेको छ । चौरजहारी नगरपालिका –२ मा रहेको कार्यालयबाट सेवाको सुरुवात गरिएको हो ।
कर्णाली प्रदेश सरकारका मुख्यमन्त्री राजकुमार शर्माले सेवाको शुभारम्भ गर्नुभएको हो । सेवा शुभारम्भ कार्यक्रममा मुख्यमन्त्री शर्माले सरकारको सेवा जनताको घरदैलोमा पु¥र्याउन झन्झटिलो कागजी प्रक्रिया बाधक रहेको जनाउनुभयो । कर्णाली सरकार समाजको सुख र सामाजिक न्यायको लागि जनताकै साथमा रहेको जनाउनुहुँदै उहाँले सरकारी सेवा व्यवहारिक हुनुपर्ने बताउनुभयो ।
‘संविधानको कार्यान्वयन र व्यवस्थाको रक्षाका लागि सबै एक हुनुपर्छ,’ शर्माले भन्नुभयो, ‘अब त सरकारका गतिविधिहरु सरकारी निकायले मात्रै समिक्षा गरेर हुँदैन, जनताले पनि समिक्षा गर्नुपर्छ ।’ चुले बैठकबाटै कामको समिक्षा गर्ने संस्कार सुरुवात हुन आवश्यक रहेको समेत उहाँले उल्लेख गर्नुभयो ।
कार्यालय स्थापना भएको लामो समयपछि सेवा सुरु गर्नुपरेको यथार्थता स्मरण गर्नुहुदै मुख्यमन्त्री शर्माले प्रक्रियामुखि र कागजी सरकारी सेवालाई चुस्त र व्यवहारिक बनाउन आवश्यक रहेको जनाउनुभयो । उहाँले हरेक निकायमा कामचोर संस्कृतिको अन्त्य गर्न जरुरी रहेको कुरामा जोड दिनुभयो । २०७६ साल भदौ २६ गते चौरजहारी नगरपालिका –१ मा कार्यालय स्थापना गरिएको थियो ।
यातायात व्यवस्था सेवा कार्यालयका प्रमुख आनन्द चापाईले कार्यालयबाट तत्कालका लागि सवारी दर्ता, नविकरण, सवारी कर असूली, सरुवा सहमतिको काम हुने जानकारी दिनुभयो । सात जना कर्मचारी दरबन्दी रहेकोमा तत्कालको लागि तीन जना कर्मचारीले सेवा सूचारु गर्ने र बाँकी चार जना कर्मचारी मन्त्रालयले पठाउने तयारी भईसरहेको समेत उहाँले बताउनुभयो ।
दरबन्दी पूर्ण भएलगत्तै चालक अनुमती पत्रको परिक्षा संचालन, गाडि दर्ता, सवारी जाँच तथा पास, रुट परमिट, चालक अनुमति पत्र नविकरण लगायतको काममा निरन्तरता दिने कार्यालय प्रमुख चापाईले बताउनुभयो । विगतमा कार्यादेश, बजेट र कर्मचारी अभावको कारण कार्यालयले सेवा प्रवाह गर्न सकेको थिएन ।
अबदेखि घर नजिकैको पायकपर्ने स्थानबाट जनताले सेवा पाउने चौरजहारी नगरपालिकाका प्रमुख पुष्प बादीले बताउनुभयो । उहाँले विगतमा कार्यालयले सेवा प्रवाह नगर्दा सुर्खेत, नेपालगन्ज र दाङ जानुपर्ने बाध्यताको अन्त्य भएको जनाउनुभयो । नगरप्रमुख बादी सवारी सम्बन्धि कामको लागि जिल्ला बाहिर जानुपर्ने बाध्यताको अन्त्य भएको उल्लेख गर्नुभयो ।
सर्वसाधारणहरु घरनजिकैबाट सेवा पाउने भएपछि खुशि भएका छन् ।
