जिल्ला प्रहरी कार्यालय रुकुम पूर्वले पछिल्लो १८ दिनमा ११ नाल बेवारिसे अवस्थामा रहेका भरुवा बन्दुक फेला पारेको छ ।

आज शुक्रबार तीन नाल भरुवा बन्दुक फेला पारेसँगै जम्मा ११ नाल बन्दुक फेला पारेको बताईएको छ । जिल्लाको भूमे गाउँपालिका वडा नम्वर - ३ कागती खोलाको जंगलमा बेवारिसे अवस्थामा रहेका तीन नाल भरुवा बन्दुक फेला पारेको प्रहरीले जनाएको छ ।

जिल्ला प्रहरी कार्यालयका अनुसार कागती खोलाको जंगलमा वेवारिसे अवस्थामा भरुवा वन्दुक रहेको छ भन्ने विशेष सुचनाको आधारमा कार्यालयबाट खटिएको प्रहरी टोलीले खोज तलास गर्ने क्रममा उक्त बन्दुक फेला पारेको हो । जंगलमा लुकाई छिपाई राखेका ती बन्दुक जिल्ला प्रहरी कार्यालयमा ल्याएर थप अनुसन्धान भइरहेको प्रहरीले जनाएको छ ।

यस अघि फागुन ८ गते सोहि वडाको तुनबाङ खोलाको जंगलमा ६ नाल भरुवा बन्दुक फेला पारेको थियो भने फागुन २१ गते जिल्लाको सिस्ने गाउँपालिका वडा नम्बर ५ रानीकोट सामुदायिक वनमा प्रहरीले दुई थान भरुवा बन्दुक फेला पारेको थियो ।