आईतबार रुकुम पूर्वमा थप १० नाल भरुवा बन्दुक फेला परेका छन् ।

जिल्लाको सिस्ने गाउँपालिका वडा नम्वर २ स्थित तैलेटाको ओढारको जंगलमा प्रहरीले १० नाल भरुवा बन्दुक फेला पारेको जनाएको छ । वेवारिसे अवस्थामा भरुवा बन्दुक रहेको सुचनाको आधारमा प्रहरीले खोज तलास गरेर जंगलमा लुकाई छिपाई राखेको भरुवा बन्दुक फेला पारेको हो ।

यस अघि फागुन २६ गते जिल्लाको भूमे गाउँपालिका वडा नम्वर ३ कागती खोलाको जंगलबाट ३ नाल, फागुन २१ गते जिल्लाको सिस्ने गाउँपालिका वडा नम्बर ५ रानीकोट सामुदायिक वनमा प्रहरीले दुई नाल र फागुन ८ गते भुमे गाउँपालिका वडा नम्वर ३ को तुनबाङ खोलाको जंगलबाट ६ नाल भरुवा बन्दुक फेला पारेको थियो ।

यससँगै प्रहरीले फागुन ८ गते यता २१ नाल भरुवा बन्दुक बरामद गरेको जनाएको छ । फेला पारेका बन्दुकहरु जिल्ला प्रहरी कार्यालयमा ल्याएर अनुसन्धान सुरु गरिएको प्रहरीको भनाई रहेको छ ।