आठ महिनाको अवधिमा रुकुम पश्चिममा क्षयरोगका १०३ जना नयाँ बिरामी भेटिएका छन् । चालु आर्थिक वर्षको साउन महिना देखि फागुन मसान्तसम्म जिल्लामा १०३ जना नयाँ क्षयरोगका बिरामी भेटिएका हुन् ।

स्वास्थ्य सेवा कार्यालयले विश्व क्षयरोग दिवसको अवसरमा शुक्रबार आयोजना गरेको कार्यक्रममा यस आर्थिक वर्षमा १०३ जना क्षयरोगका बिरामी उपचाररत रहेको खोप सुपरभाईजर कृष्ण खड्काले जानकारी दिनुभयो ।

'हो, हामी क्षयरोग अन्त्य गर्छौ' भन्ने नाराका साथ भएको कार्यक्रममा सुपरभाईजर खड्काले जिल्लाका विभिन्न स्थानहरुमा उहाँको उपचार भईरहेको जानकारी दिनुभयो । क्षयरोगीको स्वास्थ्यकर्मीको प्रत्यक्ष निगरानीमा डट्स विधिबाट उपचार हुने गरेको छ ।

सुपरभाईजर खड्काले क्षयरोगको निदान तथा उपचारका लागि जिल्लामा ३२ वटा डट्स सेन्टर, ६ वटा माईक्रोस्कोपि केन्द्र, एक वटा जिनएक्पर्ट केन्द्र र एक वटा डि आर सव सेन्टर रहेको जानकारी गराउनुभयो ।

जिल्लामा हरेक वर्ष क्षयरोगका बिरामीहरु फेला पर्ने गरेको उहाँले उल्लेख गर्नुभयो । स्वास्थ्य सेवा कार्यालयको तथ्यांक अनुसार आर्थिक वर्ष ०७७,७८ मा १३२ र आर्थिक वर्ष ०७८,०७९ मा १७६ जना क्षयरोगका बिरामी फेला परेका थिए ।

कार्यक्रममा जिल्ला स्वास्थ्य कार्यालयका मेडिकल अधिकृत डा. धिरजकुमार दासले सचेतनाको अभावमा क्षयरोगीहरु लुकेर बसेको बताउनुभयो । क्षयरोगका बारेमा जानकारी नहुँदा यसको नियन्त्रण गर्न चुनौती रहेको डा. दासले उल्लेख गर्नुभयो । उहाँले लक्षण नदेखिएर पनि क्षयरोग लाग्ने गरेको बताउनुभयो । सबैजना सचेत, जागरुप भएर अभियानकै रुपमा क्षयरोग बिरुद्ध लाग्नुपर्ने उहाँको भनाई रहेको छ ।

दिवसकै अवसरमा स्वास्थ्य सेवा कार्यालयले बिहिबार केहि विद्यालयहरुमा हाजिरी जवाफ समेत आयोजना गरेको थियो । जनस्वास्थ्य निरीक्षक कालिबहादुर ओलीले जसरी पनि सचेतना बढाउन आवश्यक रहेकोले कार्यालयको तर्फबाट विभिन्न खालका गतिविधिहरु सञ्चालन भईरहेको जनाउनुभयो ।

लक्षण देखिएका र शंका लागेका हरेक व्यक्तिले बेलैमा जाँच गराउन आवश्यक रहेको समेत ओलीले उल्लेख गर्नुभयो ।