रुकुम पूर्व / रुकुम पूर्वमा भेडाबाख्रामा लाग्ने संक्रामक पि.पि.आर., बंगुर तथा संगुरमा लाग्ने स्वाइन फिवर, कुखरामा लाग्ने रानीखेत र गोरु, गाई र भैसीमा लाग्ने खोरेत रोग बिरुद्ध ७९ हजार डोज खोज प्राप्त भएको छ ।

केन्द्रिय खोप प्रयोगशालाबाट खोप प्राप्त भएपछि पशुवस्तुहरुलाई विभिन्न रोगहरुबाट बचाउन भेडाबाख्रा, संगुर तथा बंगुर र कुखुरालाई किसानको घरदैलोमै पुगेर धमाधम खोप दिईन थालेको छ । पशुपालनका लागि अग्रणी जिल्ला मानिएको रुकुम पुर्वमा पशुवस्तुहरुलाई रोग नलागोस् भनेर अभियान नै सञ्चालन गरेर निशुल्क खोप लगाईएको हो ।

एकिकृत कृषि तथा पशुपंक्षी विकास कार्यालयको आयोजना र विभिन्न स्थानीय तहको समन्वयमा ‘खोप अभियान’ सञ्चालन गरिएको हो । दुई हप्तामा चार हजार ६९० खोप लगाईएको एकिकृत कृषि तथा पशुपंक्षी विकास कार्यालयका प्रमुख पिताम्बर बस्नेतले जानकारी दिनुभयो । उहाँका अनुसार जिल्लाका पुथा उत्तरगंगा गाउँपालिकाको वडा नम्वर १ र २ र सिस्ने गाउँपालिकाको वडा नम्वर ५, ६, ७ र ८ मा खोप लगाईएको हो ।

कार्यालय प्रमुख बस्नेतले भेडाबाख्रामा लाग्ने संक्रामक पि.पि.आर.रोग बिरुद्ध दुई हजार ७२१, संगुर तथा बंगुरमा लाग्ने स्वाइन फिवर बिरुद्ध ३५८ र कुखुरामा लाग्ने रानीखेत रोग बिरुद्ध एक हजार ६११ डोज खोप लगाई सकिएको बताउनुभयो । अन्य सबै वडाहरुमा सम्बन्धित गाउँपालिका तथा वडा कार्यालयको समन्वयमा खोप लगाईने बताईएको छ ।

एकिकृत कृषि तथा पशुपंक्षी विकास कार्यालयले प्राविधिक कर्मचारीहरु अभाव रहेका स्थानीय तहका वडाहरुमा कार्यालबाटै कर्मचारी पठाएर खोप लगाउने गरेको छ । सबै पशुवस्तुलाई खोप लगाउने लक्ष्य अनुरुप गाउँपालिकालाई खोपहरु समेत उपलब्ध गराईएको कार्यालयले जनाएको छ । कार्यालयका अनुसार जिल्लामा केन्द्रिय खोप प्रयोगशालाबाट ४८ हजार डोज पि.पि.आर. खोप, दुई हजार डोज स्वाइन फिवर बिरुद्धको खोप र २५ हजार रानीखेत बिरुद्धको खोप प्राप्त भएको छ ।

जसमध्य जिल्लाको सिस्ने गाउँपालिकामा सात हजार पाँच सय डोज पि.पि.आर, दुई सय स्वाइन फिवर र एक हजार रानीखेत विरुद्धको खोप उपलब्ध गराईएको छ । त्यसैगरी पुथा उत्तरगंगा गाउँपालिकामा १५ हजार डोज पि.पि.आर., पाँच सय स्वाइन फिवर र दुई हजार रानीखेत बिरुद्धको खोपको डोज उपलब्ध गराइएको कार्यालय प्रमुख बस्नेतले उल्लेख गर्नुभयो ।

भूमे गाउँपालिकामा १० हजार पि.पि.आर., तीन हजार स्वाइन फिवर र दुई हजार रानीखेत बिरुद्धको खोप पठाईसकिएको छ । गाउँपालिकाहरुले आवश्यकता अनुसार वडा कार्यालयसँगको समन्वयमा खोप लगाउने छन् ।

एकिकृत कृषि तथा पशुपंक्षी विकास कार्यालयका प्रमुख बस्नेतले गाईभैसीमा लाग्ने खोरेत रोग बिरुद्धको खोप पनि लगाउने कार्यक्रम रहेको बताउनुभयो । उहाँले जिल्लामा खोरेत रोग बिरुद्धको चार हजार डोज खोप आईपुगेको जानकारी दिनुहुँदै जिल्लाका सिमा नाकाहरुमा रहेका गाईभैसीमा उक्त खोप लगाइने जनाउनुभयो ।

जिल्लामा खोरेत रोग नरहेकोले भित्रन नदिनको लागि रुकुमपश्चिम, रोल्पा, बाग्लुङ्गका सिमाना रहेका गाईभैसीमा उक्त खोप लगाइने बताईएको छ । घरदैलोमै पशुवस्तुहरुमा निशुल्क खोप लगाउन पाएपछि किसानहरु भने खुशि भएका छन् ।