रुकुम पश्चिम / लक्ष्मी बैंकले रुकुम पश्चिमको त्रिवेणी गाउँपालिका -३ झुल्नेटामा बुधबारबाट एटिएम सेवा सञ्चालनमा ल्याएको छ । बैंकको झुल्नेटा शाखाले १८० औं एटिएम सेवाको रुपमा उक्त सेवाको शुभारम्भ गरेको जनाएको छ ।

एक कार्यक्रमका बीच त्रिवेणी गाउँपालिका अध्यक्ष गणेश केसीले एटिएम सेवाको उद्घाटन गर्नुभएको हो । उद्घाटन कार्यक्रममा अध्यक्ष केसीले बैंकको सेवा प्रवाहलाई थप व्यवस्थित र छरितो बनाउन एटिएम सेवा महत्वपूर्ण हुने विश्वास व्यक्त गर्नुभयो । सर्वसाधारणहरु बैंकिङ सेवाको लागि जिल्ला सदरमुकाम या अन्यत्र जानुपर्ने बाध्यताको अन्त्य गरिनुपर्ने उहाँको भनाई रहेको छ ।

ग्राहकहरुको मागलाई मध्यनजर गर्दै औपचारिक रुपमा एटिएम सेवा सञ्चालनमा ल्याएको लक्ष्मी बैंक त्रिवेणी शाखाका प्रवन्धक रुपशिला डाँगीले जानकारी दिनुभयो । उहाँले त्रिवेणीको झुल्नेटामा सञ्चालनमा आएको एटिएम सेवा कर्णाली प्रदेशका गाउँपालिका स्तरमा रहेका शाखाहरु मध्य पहिलो भएको दाबी गर्नुभयो ।

शाखा प्रवन्धक डाँगीका अनुसार रुकुम पश्चिममा लक्ष्मी बैंकले चार वटा शाखा, एक वटा एक्सटेन्सन काउन्टर र तीन वटा एटिएम मार्फत सेवा दिईरहेको छ ।

एटिएम सेवा उद्घाटन कार्यक्रममा लक्ष्मी बैंकका क्षेत्रीय संचालन प्रमुख केशव बिक्रम सेनले लक्ष्मी बैंकले दिईरहेको सेवा बारेमा जानकारी दिनुभयो । उहाँले हाल देशभर १४४ शाखाहरु, १४ एक्सटेन्सन काउन्टर र १८० एटिएम सेवा मार्फत सेवा प्रवाह गरेको बताउनुभयो ।

एटिएम सेवा उद्घाटन कार्यक्रममा त्रिवेणी गाउँपालिकाका प्रमुख प्रशासकिय अधिकृत प्रेमबहादुर घर्ती, विभिन्न वडाका वडाअध्यक्षहरु, व्यापारी, स्थानीयवासीहरु लगायतको उपस्थिती रहेको थियो ।