रुकुम पश्चिम / रुकुम पश्चिम र जाजरकोट जोड्ने ठुलीभेरी नदिमाथी बन्न लागेको मोडुलर पुल (बेलिब्रिज) भाँचिएको घटनाको छानबिन सुरु भएको छ ।

रुकुम पश्चिमको आठबीसकोट नगरपालिका –४ छरेबगर र जाजरकोटको नलगाड नगरपालिका –१२ तल्लुबगर जोड्ने बेलिब्रिज निर्माणको क्रममा भाँचिएपछि सडक विभागले छानबिन सुरु गरेको हो ।

भेरी करीडोर अन्तर्गतको उक्त पुल निर्माणको क्रममा वैशाख ७ गते दुर्घटना हुँदा दुई जना कामदारको मृत्यु भएको थियो भने सात जना घाईते हुनुभएको थियो । सडक विभागले घटनापछि सङघीय सडक सुपरीवेक्षण तथा अनुगमन कार्यालय सुर्खेतका प्रमुख रुपकराज भण्डारीको संयोजकत्वमा चार सदस्यीय छानबिन समिति गठन गरेको थियो ।

उक्त समितिले बिहिबार घटनास्थल पुगेर अनुसन्धान तथा छानबिनको काम सुरु गरेको जनाएको छ । पुल जडानको क्रममा भएको दुर्घटनाको कारण, मानवीय एवम् भौतिक क्षतिको यथार्थ विवरण सुझाव सहित प्रतिवेदन तयार गरेर पेश गर्नेगरी काम सुरु गरिएको छानबिन समितिका संयोजक भण्डारीले बताउनुभयो । घटनास्थलमा रहेका केहि कामदार, प्रत्यक्षदर्शी, साईट इन्जिनियर तथा सुपरिवेक्षक, निर्माण व्यवसायीसँगको छलफल र भाँचिएको पुलको अध्ययनसहित प्रतिवेदन तयार पारिने उहाँले जानकारी दिनुभयो ।

समितिलाई १५ दिनको कार्यावधि तोकिएकोले उक्त समय भित्र प्रतिवेदन तयार पारेर विभागलाई बुझाउने गरि काम गरिरहेको छानबिन समितिले जनाएको छ । छानबिन समितिले पुल निर्माणको कामलाई निरन्तरता दिन समेत निर्माण व्यवसायीलाई अनुरोध गरेको बताईएको छ ।

सडक डिभिजन कार्यालय चौरजहारीले समेत उक्त घटनाको अनुगमन गरेको थियो । डिभिजन कार्यालयका प्रमुख आशुतोष कर्णले निर्माणाधिन पुलमा क्रेन चढाएपछि समस्या आएको बताउनुभयो । भुईको भागबाट सामान पु¥याउन असम्भव देखिएपछि पुलमै क्रेन चढाईएको र पुलको नट बोल्ट राम्रोसँग नकसिएकोले दुर्घटना भएको उहाँको बुझाई रहेको छ ।

वर्षौदेखि प्रतिक्षारत उक्त बेलिब्रिज रुकुम पश्चिम, जाजरकोट र डोल्पा जिल्लासहित भेरी करिडोरका जनताहरुहरुको आर्थिक र सामाजिक जीवनसँग जोडिएको बताईएको छ । भेरि करिडोर अन्तगर्तको जाजरकोट–डोल्पा सडकखण्डको तल्लुबगरमा निर्माणधिन ४८ मिटर लामो उक्त बेलिब्रिज निर्माणको जिम्मा हिमसगरमाथा खड्का कृष्ण जेभी काठमाडौंले लिएको थियो ।

निर्माण कम्पनीले तीन करोड ८४ लाख रुपियाँको लागतमा बेलिब्रिज निर्माण गर्ने जिम्मा लिएको सडक डिभिजन कार्यालय चौरजहारीले जनाएको छ । २०७६ पुस २६ मा निर्माणका लागि सम्झौता गरेको जेभीले २०७९ माघ ३० सम्ममा निर्माण सम्पन्न गरिसक्नुपर्ने अवधि तोकिएको थियो ।