रुकुम पश्चिममा नेपाल पत्रकार महासंघको सदस्यता शुद्धिकरण विषयमा छलफल भएको छ ।

२०७९ पुस ८ र ९ गते कर्णाली प्रदेशको राजधानी सुर्खेतमा सम्पन्न केन्द्रीय साधारणसभाबाट “सदस्यता शुद्धीकरण अभियान २०७९” थालनी गर्ने निर्णय भएको र सोहि अनुसार केन्द्रिय कार्य समितिले जिल्लाहरुमा “सदस्यता शुद्धीकरण अभियान २०७९“ लाई सफल बनाउन अनुरोध गरेपछि शनिबार जिल्लामा छलफल भएको हो ।

जिल्लामा रहेका नेपाल पत्रकार महासंघको साधारण सदस्यहरुको विवरण संकलन गर्नको लागि सदस्यता नविकरण तथा सदस्यता सिफारिस समितिलाई जिम्मा दिने निर्णय भएको छ । नेपाल पत्रकार महासंघ जिल्ला कार्यसमिति उपाध्यक्ष गोपाल रेग्मीको संयोजकत्वमा सचिव हिरा परियार र सदस्य संगम देवकोटा रहेको समितिले सदस्यहरुको लिस्ट बनाउने भएको छ ।

समितिले तयार बनाएको विबरणको आधारमा को पत्रकारीतामा सक्रिय छ ? को छैन ? भन्ने विषयमा छलफल हुने जिल्ला शाखा अध्यक्ष लक्ष्मण केसीले जानकारी दिनुभयो । छलफलले नेपाल पत्रकार महासंघको साधारण सदस्य लिएको तर पत्रकारीता पेशामा सक्रिय नभएकाहरुलाई सदस्यता त्यागको स्वघोषणा गर्न अनुरोध गर्ने निर्णय गरेको पनि अध्यक्ष केसीले बताउनुभयो ।

सदस्यता शुद्धिकरण अभियानलाई सफल पार्नको लागि पत्रकार संगठकहरु साझारुपमा प्रतिबद्धता जनाउने छलफल पनि भएको छ ।

छलफलमा प्रेस युनियनका केन्द्रिय सदस्य प्रविर ददेल, प्रेस सेन्टर नेपालका केन्द्रिय सदस्य मेगराज खड्का, समाजवादी प्रेस संगठनका केन्द्रिय सदस्य अमरराज पुन लगायत जिल्लामा क्रियाशिल पत्रकारहरुको सहभागिता रहेको थियो । हाल रुकुम शाखामा १०३ जना साधारण सदस्य रहेका छन् ।