रुकुम पश्चिमको जिल्ला अस्पताल सल्लेबाट फिजियोथेरापी सेवा पाउँदा बिरामीहरु खुसी भएका छन् । जिल्लामै पहिलो पटक फिजियोथेरापी सेवा प्रवाह हुँदा हाडजोर्नी तथा नशाको समस्या बिरामीहरुलाई थेरापीको लागि फाईदा भएको छ ।

पहिलोपटक जिल्लामा सुरु गरेको थेरापी सेवा दिन दिनुहुँ बिरामीहरुको संख्या समेत बढीरहेको छ । स्वास्थ्य सेवा कार्यालयले फिजियोथेरापी सेवालाई प्राथमिकता दिएपछि उक्त सेवा सुरु भएको हो । अस्पतालमा हाडजोर्नी तथा नशा रोगको उपचार सेवा सुरु भएसँगै फिजियोथेरापी सेवा अत्यावश्यक रहेको थियो ।

मुसीकोट नगरपालिका –१ मठका अमृता बिकले जिल्लामै फिजियोथेरापी सेवा पाउँदा आफूलाई सहज भएको बताउनुभयो । ढाड र कम्मरको उपचारको लागि महिनामा दुई पटक दाङ वा नेपालगञ्ज जानैपर्ने बाध्यता रहेकोमा अब उक्त समस्या समाधान भएको उहाँको भनाई रहेको छ ।

जिल्ला बाहिर जानुपर्दा आर्थिक रुपमा ठुलो खर्च हुने र अन्य विभिन्न समस्या समेत हुने गरेको जनाउनुहँदै बिकले अचेल जिल्लामै नियमित उपचार सेवा पाईरहेको उल्लेख गर्नुभयो ।

जिल्लाको त्रिवेणी गाउँपालिका –४ का दिपेन्द्र खड्काले आफ्नो हाडजोर्नी सुन्निने समस्याको उपचार जिल्ला अस्पतालमै गरिरहेको बताउनुभयो । घुँडा र जोर्नी दुखाईको उपचारको लागि यसअघि जिल्ला बाहिर गएर उपचार गराईरहेका खड्काले गत चैत महिनादेखि भने जिल्ला अस्पताल आएर नियमित सेवा लिईरहनु भएको छ ।

स्वास्थ्य सेवा कार्यालयले जिल्ला अस्पतालमा गत चैत महिनादेखि फिजियोथेरापी सेवा सञ्चालनमा ल्याएको हो । फिजियोथेरापिष्ट डा. अस्मिता श्रेष्ठले जिल्लामै पहिलो पटक सुरु भएको फिजियोथेरापी सेवा लिन दैनिक बिरामीहरुको संख्या बढीरहेको बताउनुभयो । दुई महिनामा साढे पाँच सय बिरामीले फिजियोथेरापी अर्थात भौतिकचिकित्सा सेवा लिएको उहाँले जानकारी दिनुभयो ।

फिजियोथेरापी सेवा सञ्चालमा आएपछि हाडजोर्नीको उपचारसंगै नसा सम्बन्धी समस्या भएका विरामीले पनि सेवा लिईरहेका छन् । डा. श्रेष्ठका अनुसार अहिले अस्पतालमा हाडजोर्नी सुन्निने, ढाड र घाँटीको दुखाई, हड्डि भाँचिएका, नशाको समस्या भएका बिरामीहरु दैनिक २० देखि २५ जनासम्म आउने गरेका छन् ।

नशा चुडिएको, खुम्चिएको, च्यापिएको र मासु च्यातिएका बिरामीहरुले समेत फिजियोथेरापी सेवा लिन आउने गरेका छन् । बढी मात्रामा हड्डि भाँचिएका, कम्मर तथा ढाडको दुखाई भएका र हाडजोर्नी सुन्निने समस्या भएका जेष्ठ नागरिकहरुले सेवा लिईरहेका छन् ।

जिल्ला अस्पतालमा विषेश प्राथमिकताका साथ फिजियोथेरापी सेवा सञ्चालनमा ल्याएको स्वास्थ्य सेवा कार्यालयका प्रमुख डा. शुसिल पोखरेलले जानकारी दिनुभयो । उहाँका अनुसार अस्पतालमा हाडजोर्नी तथा नशा रोगको उपचार सेवा सुरु भएसँगै फिजियोथेरापी सेवा अत्यावश्यक रहेकोले उक्त सेवा सुरु गरिएको हो ।

दैनिक करिब ३० जना बिरामीहरुलाई अर्थोपेडिक सेवा दिएतापनि फिजियोथेरापी सेवाका लागि जिल्ला बाहिर जानुपर्ने बाध्यता रहेकोले जिल्लामै उक्त सेवा सुरु गरिएको डा. पोखरेलेको भनाई रहेको छ ।

अस्पतालको फिजियोथेरापी शाखामा फ्लोअप सेवाका लागि समेत बिरामीहरु आउने गरेका छन् । भौगोलिक दुरीको कारण अस्पतालसम्म बिरामीहरुको सहज पहुँच नभएकोले घरमै फिजियोथेरापी गर्नको लागि परामर्श समेत दिईने गरिएको छ । डा. श्रेष्ठले बोर्डमा लेखेर, फोटो तथा भिडियो खिच्ने व्यवस्था गरेर घरमै पनि फिजियोथेरापी गर्न बिरामीहरुलाई सिकाईरहेको बताउनुभयो ।

ग्रामिण क्षेत्रका बिरामीहरुको घरायसी व्यवहार तथा जिम्मेवारीको कारण दैनिकी परिवर्तन गर्न नसक्ने भएकोले उक्त सेवाको प्रभावकारीतामा चुनौती रहेको बताईएको छ ।