रुकुम पश्चिमको मुसीकोट नगरपालिका –१० मा सात वर्षपहिला निर्माण सुरु गरिएको सिंचाई आयोजना हालै सम्पन्न भएको छ । २०७३ सालमा निर्माण सुरु गरिएको सारापोले नमूनाबस्ती सिंचाई आयोजना सात वर्षपछि निर्माण सम्पन्न भएको हो ।

वडा कार्यालयको पहलकदमीको कारण उक्त आयोजना हाल सम्पन्न भएको हो । वडाध्यक्ष धनबहादुर खड्काले अलपत्र अवस्थामा रहेको सिंचाई आयोजना अत्यन्त मेहनतका साथ निर्माण सम्पन्न भएको बताउनुभयो । उहाँका अनुसार २०७३ सालमा साबिक जिल्ला सिंचाई कार्यालय मार्फत सुरु गरिएको उक्त आयोजना बजेट अभावको कारण अलपत्र अवस्थामा रहेको थियो ।

स्थानीय तहको सुरुवातीसँगै उक्त योजना कुनै पनि कार्यालयको योजनामा समावेश हुन सकिरहेको थियो । यस वर्ष वडा कार्यालयले खानेपानी, सिंचाई तथा उर्जा विकास कार्यालयसँग समन्वय गरेर बजेट प्राप्त भएपछि सम्पन्न भएको हो ।

पानीको ट्याङकी बन्दाबन्दैको अवस्थामा रहेको उक्त आयोजना हाल ३० लाख लगानीमा निर्माण सम्पन्न भएको खानेपानी, सिंचाई तथा उर्जा विकास कार्यालयका प्रमुख तेजनारायण महतोले जानकारी दिनुभयो । केहि रकम लगानी भैसकेको अवस्थामा रहेको र आयोजना अलपत्रको कारण गाउँमा सिंचाई समस्या रहेकोले लगानी गरिएको कार्यालय प्रमुख महतोले उल्लेख गर्नुभयो ।

सिंचाई आयोजना निर्माणसँगै वडाका सुनारटोल, साउनेपानी र मानपुर बस्तीका ५६ घर प्रत्यक्ष लाभान्वित भएको वडा कार्यालयले जनाएको छ । आयोजना अन्तर्गत मुहानबाट ट्याङकीसम्म पानी ल्याएर घरघरमा पाईप लाईन पु¥याईएको छ ।

एक लाख ८९ हजार लिटर क्षमताको पानी ट्याङकी निर्माण गरिएको छ । त्यसैगरी ५६ वटै घरमा सिंचाईको लागि स्प्रिङकलर समेत वितरण गरिएको छ ।

स्थानीय ४५ बर्षिया कालि सुनारले सिंचाई आयोजना बनेपछि खेतीयोग्य जमिनमा आवश्यकता परेको बेलामा सिंचाई गर्न पाईने बताउनुभयो । पहिला वर्षेझरीको भरमा उक्त स्थानमा गहुँ र मकै खेती हुने गर्दथ्यो । सुनारले अब सिंचाई सुविधा पुगेकोले आलु, लसुन खेती पनि गर्ने जनाउनुभयो ।

यसका साथै करेसाबारीमा तरकारी उत्पादनका लागि पनि स्प्रिङकलर मार्फत सिंचाई गर्न सहज भएको उहाँको भनाई रहेको छ । नमूनाबस्तीका किसानहरु सिंचाई सुविधा पुगेसँगै खुसी भएका छन् ।