सोसल मिडिया
रुकुम पश्चिममा ओढारमुनि लुकाई राखेको अवस्थामा आठ नाल भरुवा बन्दुक फेला परेका छन् ।
शनिबार बेलुका प्रहरीले जिल्लाको मुसिकोट नगरपालिका ८ बाट बेवारिसे अवस्थामा रहेका आठ नाल बन्दुक फेला पारेको हो ।
जिल्ला प्रहरी कार्यालयका प्रहरी नायब उपरिक्षक (डिएसपी) नमराज भट्टराईका अनुसार ओखरधाराभिर सामुदायिक वनको ओढारमा लुकाईछिपाई राखेको अवस्थामा बन्दुक फेला पारिएको हो ।
जंगलको ओढारमा लुकाएर राखेका खाली बन्दुकहरु सिकार खेल्नको लागि प्रयोग गरिएको हुनसक्ने प्रहरीको भनाई रहेको छ । प्रहरीलाई प्राप्त सूचनाको आधारमा खोजतलास गर्दैजाँदा ओढारमुनि लुकाईएको अवस्थामा बन्दुक फेला परेका थिए ।
जिल्ला प्रहरी कार्यालयबाट प्रहरी निरीक्षक धर्मेन्द्र खड्काको नेतृत्वमा गएको प्रहरी टोलीले भरुवा बन्दुक फेला पारेको हो । फेला पारिएका बन्दुकहरु प्रहरी जिल्ला प्रहरी कार्यालयमा ल्याएको छ ।
उक्त बिषयमा थप अनुसन्धान भईरहेको प्रहरीले जनाएको छ । यसअघि पनि उक्त वडाको जंगलमा प्रहरीले भरुवा बन्दुक फेला पारेको थियो ।
