सोसल मिडिया
रुकुम पश्चिमको आठबिसकोट नगरपालिका –९ राडिमा रहेको बादी समुदायको बस्तीमा खानेपानी सुविधा पुगेको छ । सरकारले सात बर्षपहिला एकिकृत नमूना बस्तीको रुपमा विकास गरेको उक्त समुदायमा सात बर्षपछि खानेपानीको सुविधा पुगेको हो ।
२०७३ सालमा सरकारले आवासविहिन बादी समुदायको लागि एकिकृत नमूना बस्ती निर्माण गरेको थियो । सरकारले १५ परिवारको लागि बासस्थान, शौचालयसँगै गाउँका बिचमा धारा बनाईएको थियो । उक्त धारामा सात वर्षपछि पानी आउन थालेको छ ।
नमूना बस्तीका १५ घरपरिवारले बासस्थान पाएको लामो समयपछि खानेपानीको सुविधा पाएको भन्दै खुशि व्यक्त गरेका छन् । ३१ वर्षिय पदम नेपालीले बस्तीको बिचमा खानेपानीको धारा आउँदा सबैजना मख्ख भएको बताउनुभयो । स्थानीय सरकारले बादी समुदायको मागलाई सम्बोधन गरेर आवास व्यवस्थापनसँगै खानेपानी सेवा दिएको उहाँले उल्लेख गर्नुभयो । नमूना बस्तीका बादी समुदायले यस अघि नजिकैको भेरी नदिबाट पानी बोकेर पीउने गरेका थिए ।
नमूना बस्तीकी हिरा बादीले घर नजिकै खानेपानीको धारा आएकोले दैनिकी सहज बनेको बताउनुभयो । भेरीको पानी बोकेर प्रयोग गर्नुपर्ने बाध्यता रहेकोमा अब बस्ती बिचमा धारामै पानी आउन थालेको बादीले जनाउनुभयो । बादीले भन्नुभयो, “आजभोली त नियमित घर नजिकैको धारामा पानी आउँछ, गाग्री बोकेर भेरीनदि जानुपर्दैन ।” धाराको पानी पीउनका साथै लत्ताकपडा धुन, नुहाउन र करेसाबारीमा समेत प्रगोग गरिरहेको उहाँको भनाई रहेको छ ।
चाडपर्व, महामारी र आपतको बेलामा स्थानीय सरकारले बादी समुदायमा सहयोग गर्ने गरेको यहाँका स्थानीयले जनाएका छन् ।
आठबिसकोट नगरपालिका वडा नम्वर ९ का वडा सदस्य नवराज मल्लले बादी समुदायका १५ घरको लागि एक वटा धारा निर्माण गरिएको बताउनुभयो । वडा कार्यालयमा नगरपालिकाबाट आएको खानेपानी योजनाको बजेट मध्य प्राथमिकताका साथ नमूना बस्तीमा धारा पु¥याईएको हो ।
वडा सदस्य मल्लले १४ लाख बजेटबाट १५ वटा नारा निर्माण गर्ने योजना रहेतापनि पानीको पर्याप्तता र स्थानीयले श्रमदान गरेर धारा बनाउने भएपछि वडाभर ३५ वटा धारा बनाईसकिएको जानकारी दिनुभयो । नमूना बस्तीमा रहेका बादी समुदायमा यस अघि खानेपानीको सुविधा नहुँदा भेरीनदि र अन्य स्थानीयका घरमा जोडिएका धाराको पानी मागेर प्रयोग गर्दै आएको वडा सदस्य मल्लले जनाउनुभयो ।
आठबिसकोट नगरपालिकाका प्रमुख रबि केसीले एकिकृत बस्तीमा घेराबार र घरघरमा खानेपानीका फिल्टरहरु माग हुने गरेकोले अब ती मागहरु सम्बोधन गरिने बताउनुभयो । सरकारले पछाडि पारिएका समुदायको सशक्तिकरणका लागि बिभिन्न खालका योजनाहरु पनि अघि सारिएको नगर प्रमुख केसीले जानकारी दिनुभयो ।
बादी समुदायका अगुवाहरुले निशुल्क स्वास्थ्य सेवा र गुणस्तरिय शिक्षाको लागि स्थानीय सरकारको सहयोगको अपेक्षा गरेको जनाएका छन् ।
