रुकुम पश्चिमको मुसिकोट नगरपालिका वडा नम्वर १० मा लसुनपार्क निर्माण गरिएको छ । वडामा सबैभन्दा बढी लसुन उत्पादन हुने झ्याङ बस्तीको बिचमा लसुनपार्क बनाईएको हो ।

वडाध्यक्ष धनबहादुर खड्काले दिनुभएको जानकारी अनुसार लसुन उत्पादन हुने गाउँको पहिचान स्थापीत गर्न सार्वजनिक पार्कमा लसुनको स्तम्भ बनाएर लसुनपार्क नामाकरण गरिएको हो ।

टोलमा हुने आमा समुह, वन समुह लगायत विभिन्न सार्वजनिक बैठक तथा छलफलको लागि उपर्युक्त स्थानको अभाव खड्किएपछि वडा कार्यालयले सार्वजनिक स्थानमा चौतारी तथा बिसाउनी निर्माणका लागि योजना बनाएको थियो । सार्वजनिक पार्क बनाउने उद्धेश्यबाट सुरु गरिएको यस योजनामा थोरै बजेट थप्दा लसुनपार्क नै बन्ने भएपछि करिब पचास हजारको लगानीमा लसुनको स्तम्भ थपिएको हो ।

लसुन पार्क निर्माणको लागि वडा कार्यालयले दश लाख रकम लगानी भएको जनाएको छ । यस कार्यमा स्थानीयवासीले समेत स्वतस्फूर्त रुपमा विभिन्न सहयोग गरेको वडा कार्यालयले जनाएको छ ।

बस्तीको बिचमा बनाईएको उक्त लसुनको स्तम्भ स्थानीयस्तरमै सोहि गाउँका बुद्धिराज बुढाले निर्माण गर्नुभएको हो । स्थानीय क्षमताको सदुपयोग र बस्तीको उत्पादनको समेत प्रचार गर्न सकिने भएकोले लसुन पार्क बनाईएको वडाध्यक्ष खड्कोल बताउनुभयो ।

झ्याङ बस्ती व्यवसायीक रुपमा लसुन खेती गर्ने वडाकै पहिलो बस्ती हो । यस बस्तीमा रहेका ३० घर परिवार नै व्यवसायीक लसुन खेतीमा लागेका छन् । सोहि बस्तीका देबिका खड्काले गाउँको बिचमा लसुनको सालिक बनाएर किसानले गरेका उत्पादनको प्रचारको लागि महत्वपूर्ण काम भएको बताउनुभयो । उहाँले बस्तीमा सार्वजनिक बिसाउनी र लसुन पार्क बन्नु दोहोरो फाईदा भएको उल्लेख गर्नुभयो ।

यहाँका एक घरले एक सिजनमा डेढ लाख सम्मको लसुन बिक्रि गर्ने गरेका छन् । यस बस्तीमा एक सिजनमा करिब दुईसय क्विन्टल लसुन उत्पादन र बिक्रि हुने गरेको छ । यहाँको लसुन जिल्ला भित्र र जिल्ला बाहिर बिक्रि हुने गरेको छ ।

लसुनको बजारीकरणमा समेत वडा कार्यालयले सहजिकरण गरेर व्यापारीहरु गाउँमै आउने वातावरण बनाएको छ । गाउँमै लसुन किन्न व्यापारीहरु आउने भएपछि व्यावसायीक किसानहरु उत्साहित भएका छन् ।