रुकुम पूर्वको सिस्ने गाउँपालिकाले हालसम्म सम्पादन गरेका कार्य प्रगतिहरु प्रस्तुतीका साथै आर्थिक वर्ष २०७९/८० को दोस्रो चौमासिकको सार्वजनिक सुनुवाइ सम्पन्न गरेको छ ।

बुधबार गाउँपालिकाले एक कार्यक्रमक आयोजना गर्दै गाउपालिकाको कार्यालयमा जिल्लाका विभिन्न राजनीतिक दलहरु, पत्रकारहरु, स्थानीय बुद्धिजिवी तथा सर्वसाधारणहरुको उपस्थितिमा सार्वजनिक सुनुवाइ गरिएको हो ।

कार्यक्रममा गाउपालिकाले आथिक वर्ष २०७९/८० मा जिल्लामा संचालन गरिएका बिबिध योजना तथा गाउँपालिकाको उपलब्धिका बारेमा जानकारी गराइएको छ ।

कार्यक्रममा गाउँपालिकाका प्रमुख प्रशासकीय अधिकृत बिकास बिक्रम शाहले स्थानीय सरकारबाट भैरहेका सेवा प्रवाह का बारेमा जानकारी गराउनुभएको थियो । यस्तै गाउँपालिकाका अध्यक्ष कृष्ण रेग्मीले सहभागीहरुलाई गाउँपालिकाले हाल सम्म गरेका कार्य प्रगतिको बारेमा प्रतिबेदन प्रस्तुत गर्नुभएको थियो ।

उहाँले दोस्रो स्थानीय सरकार निर्वाचित भैसकेपछि नीति, नियम निर्माण, योजना निर्माण, गाउँपालिकाको वस्तुगत अवस्था, हालसम्म गरिएका बिकास निर्माणका कार्यहरु का बारेमा प्रतिबेदन प्रस्तुत गर्नुभएको थियो । गाउँपालिकाले गरेका नीतिगत, भौतिक, आर्थिक, सामाजिक, मानवीय लगायतका क्षेत्रका प्रगतिहरुका बारेमा पनि प्रतिबेदन प्रस्तुत गर्नुभएको थियो ।

सार्वजनिक सुनुवाइ कार्यक्रमका सहभागी हरुले स्वास्थ्य, शिक्षा, सडक, विद्युत, खानेपानी लगाएतका विषयहरुमा आफ्ना जिज्ञासाहरु राखेका थिए । सहभागीका जिज्ञासाहरुको जवाफ गाउँपालिका अध्यक्ष कृष्ण रेग्मी, उपाध्यक्ष गोपाल रेउले, प्रमुख प्रशासकीय अधिकृत बिकास बिक्रम शाह, लगाएत विभिन्न शाखाका प्रमुखहरुले दिएका थिए ।

कार्यक्रममा जिल्ला समन्वय समितिका प्रमुख मेघबहादुर श्रेष्ठ, उपप्रमुख मोहोन केसी, गाउँपालिका अध्यक्ष रेग्मी, उपाध्यक्ष रेउले, लगाएतको उपस्थिति रहेको थियो । कार्यक्रमको सहजीकरण पत्रकार सर्जना कार्कीले गर्नुभएको थियो ।