रुकुम पूर्वको सिस्ने गाउँपालिकाले नवनिर्मित प्रशासनिक भवनबाट सेवा सुरु गरेको छ ।

सिस्ने गाउँपालिका ५ मा रहेको गाउँपालिकाको सुविधासम्पन्न भवनबाट सेवा प्रवाह सुरु गरिएको गाउँपालिकाका इन्जिनियर कर्ण केसीले जानकारी दिनुभयो ।

निर्माण सुरु गरिएको दुई वर्षपछि काम सकिएपछि नयाँ भवनबाट सेवा दिन थालिएको हो । ईन्जिनियर केसीका अनुसार तीन तले उक्त भवनमा २६ वटा कोठा रहेका छन् ।

कुल ६७२ स्क्वायर फिट क्षेत्रफलमा फैलिएको यो भवन आर्थिक वर्ष ०७७/७८ देखि निर्माण कार्य सुरु गरिएको थियो । ४ करोड ९७ लाखको लागतमा भवन निर्माणको लागि यति विल्डर्सले जिम्मा लिएको थियो ।

गाउँपालिकाका प्रमुख प्रशासकीय अधिकृत विकास विक्रम शाहले नयाँ भवनबाट एकीकृत र व्यवस्थित सेवाप्रवाह सुरु गरिएको बताउनुभयो । उहाँका अनुसार नयाँ भवनमा गाउँपालिका अध्यक्ष, उपाध्यक्षको कार्यकक्ष, बैठक हल, पुस्तकालय, वडा अध्यक्ष समन्वय कक्ष, कार्यालय प्रमुख निवास सहित कार्यपालिकाका विभिन्न शाखाहरु रहेका छन् । यसका साथै गाउँपालिका स्टोर र स्वास्थ्य स्टोर समेत यसै भवनमा रहेको छ ।

गाउँपालिकाको पशु सेवा शाखाले पुरानै भवनबाट सेवा प्रवाह गरिरहेको र अन्य सबै शाखाहरुले नयाँ भवनबाटै सेवा प्रवाह गरिरहेको प्रमुख प्रशासकीय अधिकृत शाहले जानकारी दिनुभयो ।

गाउँपालिकाको आफ्नै भवन नहुँदा यसअघि हाल नवनिर्मित भवन नजिकैको सभाहललाई मुख्य कार्यालयका रुपमा प्रयोग गरिएकाे थियो । कृषि विकास तथा पशु सेवाको भवन र पाहुना घरसमेतलाई प्रयोग गरेर गाउँपालिकाले सेवा प्रवाह गरेको थियो ।