रुकुम पश्चिम । डिभिजन वन कार्यालय रुकुम पश्चिमले विभिन्न सामुदायिक वनमा भएको आर्थिक हिनामिनाको रकम फिर्ता गराएको छ । कार्यालयले सामुदायिक वनको उपभोक्ता समितिले गरेको रकम हिनामिना उपर निगरानी गरेपछि रकम फिर्ता हुन थालेको हो ।  

डिभिजन वन कार्यालयका प्रमुख शेरबहादुर परियारका अनुसार पछिल्लो छ महिनामा १२ वटा सामुदायिक वनमा भएको आर्थिक हिनामिनाको रकम दाखिला गरिएको छ । अनियमिततालाई कडाई गरेपछि १४ लाख बढी रकम फिर्ता भएको उहाँले जानकारी दिनुभयो ।

उहाँका अनुसार १२ वटा सामुदायिक वनमा रहेका उपभोक्ता समितिका पदाधिकारीहरुले हिनामिना गरेको १४ लाख ५८ हजार ७५० रुपियाँ सम्बन्धित वन समहुकोे खातामा दाखिला भएको छ ।  

वन कार्यालयले दिएको जानकारी अनुसार चौरजहारी नगरपालिका –८ कोटजहारीमा रहेको खरिपाखा सामुदायिक वन उपभोक्ता समुहको खातामा एक लाख ६६ हजार ७५० रुपिँया दाखिला गरिएको छ । उक्त रकम वन ऐन, २०७६ बमोजिक खर्च नगरी मनलाग्दी खर्च गरिएको थियो ।

त्यसैगरी चौरजहारी नगरपालिका –११ सर्केनाको जनकल्याण सामुदायिक वन उपभोक्ता समुहको खातामा तीन लाख रुपिँया जम्मा भएको छ । उपभोक्ता समितिका पदाधिकारीहरुले चलाएको उक्त रकम डिभिजन वन कार्यालयले कारबाहि गर्नेभएपछि फिर्ता गरिएको हो । 

त्यसैगरी त्रिवेणी गाउँपालिका –७ मा रहेको झाँक्रिपानी सामुदायिक वन उपभोक्ता समुहमा ६२ हजार र सोहि पालिकाको वडा नम्वर –१० मा रहेको सिरुगैरा सामुदायिक वन उपभोक्ता समितिको खातामा दुई लाख रकम दाखिला भएको छ । यी दुबै समुहका पदाधिकारीहरुले शिर्षक भन्दा बाहिर गएर वन समुहको पैसा चलाएका थिए । 

त्रिवेणी गाउँपालिका –९ को कोलगारे रत्निमारे सामुदायिक वन उपभोक्ता समितिको खातामा हाल ७२ हजार रकम जम्मा भएको छ । बाटो निर्माण कार्य वापत समुहलाई आएको उक्त रकम समुहका पदाधिकारीहरुले व्यक्तिगत रुपमा प्रयोग गरेका थिए ।

तोकिएको शिर्षक भन्दा अन्यत्रै खर्च गरिएको त्रिवेणी गाउँपालिका –८ को गुरगुरे सामुदायिक वन उपभोक्ता समितिमा पनि १५ हजार रुपिँया फिर्ता भएको छ । 

डिभिजन वन कार्यालयका अनुसार बाँफिकोट गाउँपालिका –४ मा रहेको ज्यामिरे सामुदायिक वन उपभोक्ता समितिको रकम लामो समयदेखि चलाउँदै आएका एक पदाधिकारीले हाल फिर्ता गरेका छन् । अहिले उक्त समुहको खातामा एक लाख बीस हजार रकम दाखिला भएको छ ।

त्यसैगरी चौरजहारी नगरपालिका –१० मा रहेको ढुङगेधारा सामुदायिक वन उपभोक्ता समुहमा घुम्ती कोषको नाममा तीन लाख २८ हजार रकम हिनामिना भएको थियो । उक्त रकम अहिले समुहको खातामा फिर्ता गरिएको छ । 

आठविसकोट नगरपालिका –१० मा रहेको रानी सल्लेरी सामुदायिक वन उपभोक्ता समुहमा ६८ हजार र सोहि नगरपालिका ४ मा रहेको चुरेपाटा पाखापानी सामुदायिक वन उपभोक्ता समुहमा एक लाख १७ हजार रुपिँया जम्मा भएको छ । यी समुहका पूर्व पदाधिकारीहरुले आफू अनुकुल खर्च गरेको उक्त रकम कारबाहिको डरले फिर्ता गरेका हुन् ।

त्यसैगरी सल्लेरी बेतुखोला दलुकेनीगैरा सामुदायिक वन उपभोक्ता समुहको खातामा पनि अनियमित रुपमा खर्च भएको दश हजार रुपिँया दाखिला भएको छ । 

कार्यालय प्रमुख परियाले विभिन्न स्थानबाट वन समुहमा अनियमितता भएको गुनासो आएपछि एक वन कर्मचारीले पाँच वटा सामुदायिक वन हेर्ने गरेर काममा खटाईएको र सोहि क्रममा हिनामिना भएको रकम पत्ता लागेको बताउनुभयो ।

वन ऐन, २०७६ को दफा ४९(द) बमोजिक कारबाहि हुने भएपछि रकम धमाधम फिर्ता गरेको उहाँले जानकारी दिनुयभयो । अझै पनि दश वटा समुह निगरानीमा रहेको समेत उहाँले उल्लेख गर्नुभयो ।