सोसल मिडिया
रुकुम पूर्व । रुकुम पूर्वको रुकुमकोटमा निर्माणाधिन एक आयोजनाको निर्माणको काम गुणस्तरहिन भएपछि स्थानीय सरकारद्वारा भत्काईएको छ ।
सिस्ने गाउँपालिकाको वडा नम्वर ५ र ६ मा निर्माण भईरहेको रुलिखोला–सेराखेत ढल निकास आयोजना अन्तर्गत निर्माण भईरहेका दश वटा मङगल (च्याम्बर) भत्काईएको हो ।
जिल्लाको सिस्ने गाउँपालिकास्तरिय अनुगमन समितिले निर्माणको काम गुणस्तरहिन भएको पाईएपछि भत्काएको जनाएको छ । अनुगमन समितिका संयोजक समेत रहनुभएका गाउँपालिका उपाध्यक्ष गोपाल रेउलेले जिल्लाको मुख्य प्रशासनिक केन्द्रमै गुणस्तरहिन काम भएको पाईएपछि भत्काईएको बताउनुभयो ।
प्राविधिकसहितको टोलीले गरेको अगुनमनका क्रममा दश वटा च्याम्बरमा सम्झौता विपरित काम भएको उपाध्यक्ष रेउलेले बताउनुभयो । कमसल सामाग्रीको प्रयोगले विकासको काममा गुणस्तरियता नहुने भएकोले स्थानीय सरकारले बाध्य भएर निर्माणाधिन दश वटा च्याम्बर भत्काउनु परेको उल्लेख गर्नुभयो । उपाध्यक्ष रेउलेले भत्काईएका निर्माणाधिन च्याम्बरहरु गुणस्तरसहित निर्माण गर्न निर्देशन गर्नुभयो ।
सिस्ने गाउँपालिकाका ईन्जिनियर कर्ण बहादुर केसीले अनुगमनको क्रममा सिमेन्ट, गिट्टि र वालुवाको मिसावटमा लापरबाहि गरिएको पाईएको बताउनुभयो ।
ढल निकास आयोजना अन्तर्गत निर्माण भईरहेका ३० वटा च्याम्बर मध्य दश वटामा मापदण्ड विपरित काम भएको उहाँको भनाई रहेको छ । आरसिसी च्याम्बरको ढकनीको स्पानमा कमसल सामाग्रीको प्रयोग भएको कारण भत्काईएको इन्जिनियर केसीले उल्लेख गर्नुभयो ।
संघीय सरकारको समपुरक अनुदान अन्तर्गतको उक्त आयोजना निर्माणका लागि सिस्ने गाउँपालिका र संघीय सरकारको बराबरी लगानी रहेको छ । गाउँपालिकाले दिएको जानकारी अनुसार कुल तीन करोड चालिस लाखको लागतमा निर्माणाधिन उक्त आयोजनाको ठेक्का रञ्जित रंगोन रेशुङ्गा दर्शन जेभि गुल्मीले लिएको छ ।
जिल्ला सदरमुकाम समेत रहेको रुकुमकोटको वडा नम्वर ५ र ६ को ढलको फोहोरपानी व्यवस्थित गर्ने गरेर उक्त आयोजना सुरु गरिएको हो । आयोजना अन्तर्गत ८३० मिटर हिमपाईप बिछ्याउने र २७० मिटर आरसिसी क्यानल बनाउने काम भईरहेको छ ।
निर्माण कम्पनीका प्रतिनिधी जय केसीले च्याम्बर निर्माणको सामाग्री मिसावटमा केहि गल्ति भएको स्विकार गर्नुभयो । उहाँले आगामी असार २० गतेभित्र निर्माण सम्पन्न गरिसक्नेगरी सम्झौता गरेकोले सोहि अवधिभित्र काम गरिसक्ने बताउनुभयो । गुणस्तरहिन सामाग्री प्रयोग भएका भनिएका च्याम्बरहरु भत्काएर पुनः काम सुरु गरिएको उहाँको भनाई रहेको छ ।
उपाध्यक्ष गोपाल रेउलेको नेतृत्वमा भएको अनुगमनमा ईन्जिनियर कर्णबहादुर केसी, करण खड्का र गाउँपालिकाका योजना शाखा अधिकृत अरुण कुमार ओली लगाएतको सहभागिता रहेको थियो ।
