सोसल मिडिया
रुकुम पश्चिम । रुकुम पश्चिमको चौरजहारी नगरपालिकास्थित शान्तिबजार देखि चौफा बजारसम्मको सडकखण्डमा कालोपत्रे गरिएको छ । नगरपालिकाको वडा नम्वर ६ शान्तिबजार देखि वडा नम्वर ११ कौ चौफासम्मको सडक कालोपत्रे गरिएको हो ।
चौरजहारी–खोलागाउँ–नुवाकोट सडकखण्ड अन्तर्गतको उक्त सडक निर्माण तथा कालोपत्रेको काम यति विल्डर्सले गरेको हो । पूर्वाधार विकास कार्यालय चौरजहारी अन्तर्गतको उक्त ठेक्का यति विल्डर्सले पाएको थियो ।
यति विल्डर्सका भिमराज केसीका अनुसार ३.१ किलोमिटर सडकमा कालोेपत्रे (प्रिमिक्स कार्पेट) गरिएको हो । यस कार्यका लागि पूर्वाधार विकास कार्यालयसँग निर्माण कम्पनी यति विल्डर्सले पाँच करोड ५० लाख रुपिँयामा सम्झौता गरेको बताईएको छ ।
तोकिएकै समयमा गुणस्तरिय काम भएको भन्दै स्थानीयहरु हर्षित भएका छन् । सडक कालोपत्रे भएपछि नगरपालिकाको केन्द्र चौरजहारी, बजार, अस्पताल आवतजावतमा सहज हुने स्थानीयको भनाई रहेको छ ।
सरोकारवाला निकायहरुले पनि तोकिएको समयमा निर्माण कम्पनीले गुणस्तरिय काम गरेको प्रतिक्रिया दिएका छन् ।
कालोपत्र गरिएको सडकखण्डको गत बिहिबार जिल्ला समन्वय समिति, जिल्ला प्रशासन कार्यालय, चौरजहारी नगरपालिका, पूर्वाधार विकास कार्यालय लगायतका निकायले अनुगमन समेत गरेको बताईएको छ ।
