सोसल मिडिया
रुकुम पश्चिम । रुकुम पश्चिमको बाँफिकोट गाउँपालिकाका तीन वडामा १८ हजार बढी फलफूलका विरुवा रोपिएको छ । गाउँपालिकाको वडा नम्वर ६, ८ र ९ मा सुन्तला, कागती र किविका १८ हजार एक सय विरुवा रोपिएको हो ।
बाँफिकोट गाउँपालिकाका कृषि शाखा प्रमुख लोकेन्द्र ओलीका अनुसार १३ हजार पाँच सय सुन्तला, चार हजार कागती र ६ सय किविका बिरुवा रोपिएको हो ।
सबैभन्दा बढी वडा नम्वर ८ को दुलिमा आठ हजार सुन्तला र चार हजार कागतीका विरुवा रोपिएको छ । त्यसैगरी वडा नम्वर ९ मा एक हजार चार सय सुन्तला रोपिएको छ भने वडा नम्वर ६ स्यालामा चार हजार एक सय सुन्तलाका विरुवा रोपिएको शाखा प्रमुख ओलीले जानकारी दिनुभयो । स्यालामै ६ सय किविका बिरुवा रोपिएको छ ।
गाउँपालिकाको शसर्त अनुदान कार्यक्रम अन्तर्गत सञ्चालित कृषि व्यवसाय प्रवद्र्धन कार्यक्रमबाट किसानहरुलाई फलफूलका विरुवा उपलब्ध गराईएको गाउँपालिकाले जनाएको छ ।
बाँफिकोट गाउँपालिका वडा नम्वर ६ का किसान समकृती पुनले गाउँपालिकाले उपलब्ध गराएका विरुवाहरु रोपिसकेको बताउनुभयो ।
युवा सिर्जनशील कृषि तथा पशुपंक्षी फर्म सञ्चालन गरिरहनुभएकी उहाँले वडालाई सुन्तला पकेट क्षेत्रका लागि बजेट व्यवस्थापन गर्न अनुरोध गरिएको जानकारी दिनुभयो । स्याला टोलमा मात्रै अझै करिब सात हजार सुन्तलाका विरुवाहरु रोप्ने योजना रहेको उहाँले बताउनुभयो ।
स्याला टोलमा मात्रै हालै चार हजार एक सय सुन्तलाको विरुवाहरु सामुहिक रुपमा रोपिएको र उक्त कार्यमा किसानहरु अत्यन्तै हर्षित भएर सहभागी भएको पुनले बताउनुभयो । स्याला टोलका ३६ घर यस कार्यबाट प्रत्यक्ष लाभान्वित हुने उहाँको भनाई रहेको छ ।
फलफूल उत्पादनका हिसाबले प्रशस्त सम्भावना बोकेको यस क्षेत्रका किसानहरुले स्थानीय सरकार समक्ष चिस्यान केन्द्रको लागि माग गरेका छन् ।
