सोसल मिडिया
रुकुम पश्चिम । आकाशबाट दर्किरहेको पानी र सडकमा बगिरहेको भल । यसैमा रुकुम पश्चिमको चौरजहारीको मुख्य बजारमा कालोपत्रे भईरहेको छ । सुन्दा पनि लाजमर्दो यस अवस्थाको कालोपत्रेको काम तत्काल रोक्नुपर्ने स्थानीयको माग रहेको छ ।
नयाँ शहर आयोजना अन्तर्गत क्याराभान कन्ट्रक्सनले गरिरहेको कालोपत्रेको काम लाजमर्दो गरी भईरहेपछि स्थानीयले बिरोध जनाएका छन् ।
चौरजहारी नगरपालिका २ का टिकाराम बिष्टले घर अगाडि कालोपत्रे भईरहेको तर, कालोपत्रे हालेको बाटोमा पानी बुल्किरहेको बताउनुभयो । उहाँले कालोपत्रे छर्केर सडकको गुणस्तर झन् खस्काएको बताउनुभयो ।
आकाशबाट पानी बर्सिरहेको र सडकमा भल बगिरहेको बेला पनि कालोपत्रे हालेको स्थानीयले बताएका छन् । यस खालको कार्यले सडक झन् बिग्रने र सरकारको लगानी खेर जाने उनीहरुको भनाई रहेको छ ।
चौरजहारी नगरपालिका क्षेत्रका १, २ र ३ वडामा यस निर्माण कम्पनीले अहिले कालोपत्रेको काम गरिरहेको छ । गुणस्तरहिन यस खालको काम तत्काल रोकेर यस्ता लापरबाहिपूर्ण कार्य गर्नेलाई कारबाहि गर्नुपर्ने स्थानीयको माग रहेको छ ।
