सोसल मिडिया
रुकुम पूर्व । रुकुम पूर्वको सिस्ने गाउँपालिका भित्रका जग्गाको कित्ताकाँट खुलेको छ ।
मालपोत कार्यालय रुकुम पूर्वले शुक्रबार एक सूचना मार्फत सिस्ने गाउँपालिका भित्र रहेका जग्गाको कित्ताकाँट खुलेको जानकारी गराएको हो ।
मालपोत अधिकृत मोहनलाल केसीले असार २६ गतेबाट सिस्ने गाउँपालिका भित्रका जग्गाको कित्ताकाँट खुल्ने गरी निर्णय भएको बताउनुभयो । उहाँले सिस्ने गाउँपालिकाको भू-उपयोग परिषदले भू-वर्गिकरण गरि कित्ताकाँट खुलाउने निर्णय गरेर सिफारिस आएकोले कित्ताकाँट फुकुवा हुने जनाउनुभयो ।
सिस्नेले भू-उपयोग नियमावली, २०७९ बमोजिक भू-उपयोग क्षेत्र वर्गिकरणका आधार र मापदण्ड अनुसार भू-वर्गिकरण गरेको हो ।
जिल्लाको भूमे र पुथा उत्तरगंगा गाउँपालिकाबाट नियामानुसार भू वर्गिकरण गरेको निर्णय नआएकाले त्यहाँको जग्गाको कित्ताकाँट फुकुवा भएको छैन । गत वर्षको जेठ २३ बाट कित्ताकाँट बन्द भएको थियो ।
कित्ताकाँट गर्नको लागि आउने सेवाग्राहिहरुले सम्बन्धित वडा कार्यालयको सिफारिस ल्याउनुपर्ने मालपोत अधिकृत केसीले उल्लेख गर्नुभयो ।
