रुकुम पश्चिम । रुकुम पश्चिमको मुसिकोट नगरपालिकाले चालु आर्थिक वर्ष ०७९/८० मा ८७.५ प्रतिशत बजेट खर्च गरेको छ । नगरपालिकाले चालु आर्थिक वर्षमा ८१ करोड २३ लाख ७९ हजार रुपिँया खर्च गरेको जनाएको छ । 

निमित्त प्रमुख प्रशासकिय अधिकृत बिनाराम खड्काका अनुसार यस आ.व.मा चालु तर्फ ५३ करोड २९ लाख १४ हजार अर्थात ८५.४७ प्रतिशत रुपिँया खर्च भएको छ । त्यसैगरी पुर्जिगतर्फ भने २७ करोड ९४ लाख ६५ हजार अर्थात् ९०.२३ प्रतिशत बजेट खर्च भएको छ । 

यस आर्थिक वर्षमा ६२ करोड ३५ लाख २३ हजार रुपिँया चालुतर्फ र ३० करोड ९७ लाख ३४ हजार रुपिँया पुर्जिगत तर्फ विनियोजन भएको थियो । निमित्त प्रमुख प्रशासकिय अधिकृत खड्का अनुसार विनियोजित वजेट मध्य यस वर्ष विगतका पाँच वर्षभन्दा बढी प्रगती भएको हो । 

उहाँका अनुसार गत आर्थिक वर्ष ०७८/०७९ मा विनियोजित बजेटको ८४.७१ प्रतिशत मात्र खर्च भएको थियो भने आर्थिक वर्ष ०७७/०७८ मा ७८.२३ प्रतिशत रकम खर्च भएको थियो । त्यसैगरी आर्थिक वर्ष ०७६/०७७ मा ६७.७२ प्रतिशत वजेट खर्च भएको थियो भने आर्थिक वर्ष ०७५/०७६ मा भने ८५.२९ प्रतिशत वजेट खर्च भएको थियो । 

अधिकृत खड्काले अझै खर्चमा प्रगती गर्न सकिने अवस्था हुँदा पनि विविध समस्याको कारण हुन नसकेको बताउनुभयो । उहाँले केहि योजनाहरु ढिला गरी आएको र कर्मचारीहरुको तलब एलएमबिआईएस मा अन्तिम समयमा ईन्ट्री हुँदा केहि समस्या भएको बताउनुभयो । 

मुसिकोट नगरपालिकाका लेखा शाखा प्रमुख नरेन्द्र बिष्टले संघीय राजश्व बाँडफाँड अन्तर्गतको दुई करोड ७५ लाख रुपिँया नआउँदा समस्या भएको बताउनुभयो । उहाँले लक्ष्य अनुसारको राजश्व उठ्न नसकेको र अनलाईन प्रणालीमा बेला बेलामा आउने समस्याको कारण पनि बित्तिय प्रगतीमा केहि कमी आएको उल्लेख गर्नुभयो । तथापी यस वर्ष उल्लेख्य प्रगती भएको उहाँको भनाई रहेको छ ।

संघीय सरकारबाट आउनुपर्ने रकम नआएपछि नगरपालिकाले ६४ लाखको दायित्व बेहोर्नु परेको छ । नगर करार शिक्षकहरुको तलबको लागि आगामी वर्षमा खर्च लेखिने गरेर दायित्व भएको नगरपालिकाले जनाएको छ ।